Објавен е првиот трејлер за спортскиот биографски филм „Кристи“, во кој Сидни Свини ја игра легендарната американска боксерка Кристи Мартин. Филмот неодамна ја имаше својата светска премиера на Меѓународниот филмски фестивал во Торонто, со критички и комерцијални признанија, а во кината треба да се појави на 7 ноември.
Режисерот и ко-сценарист Дејвид Мишод ја раскажува инспиративната, но трогателна приказна за Кристи Мартин, првата вистинска боксерска ѕвезда која воведе нова генерација боксерки кон крајот на 1980-тите и 1990-тите. Растејќи во мал град во Западна Вирџинија, Кристи изгради репутација на неуморен натпреварувач во рингот, а подоцна стана првата боксерка што ја краси насловната страница на „Спортс илустрејтид“.
Филмот го прикажува нејзиниот професионален подем под водство на нејзиниот тренер и менаџер Џим, кој го игра Бен Фостер, како и нејзините лични борби надвор од рингот – од семејни конфликти и потрага по сопствениот идентитет, до насилна и опасна врска со Џим, која ѝ го загрозува животот. Трејлерот најавува филм кој комбинира сцени со бокс кои го поттикнуваат адреналинот со интимна драма и тешки емотивни моменти.
Покрај Свини и Фостер, во филмот глумат и Мерит Вевер, Кети О’Брајан, Итан Ембри, Џес Габор, Чед Колман, Брајан Хибард, Тони Кавалеро и Гилберт Круз. Сценариото го напишаа Мишод и Мира Фолкс според приказна од Кетрин Фугејт. Филмот го продуцираа Кери Кохански-Робертс, Теди Шварцман, Брент Стифел, Џастин Лотроп, Мишод и самата Свини.
За најавтентично да ја портретира Кристи Мартин, Свини поминала низ интензивна физичка подготовка и трансформација – тренирала два до три пати на ден, работела со тренери за бокс, нутриционисти и тренери за сила и се здебелила 13 килограми.
Нејзината трансформација вклучувала и носење леќи и перика, сè со цел да го долови изгледот на боксерката која била во брак со својот тренер, кој во 2010 година се обидел да ја убие.
Повеќепати ја прободел со нож и пукал во неа. Откако преживеала повеќе брутални напади, Кристи се омажила за својата поранешна противничка Лиза Холовајн, додека Џим бил осуден на 25 години затвор.
„Апсолутно го обожавав процесот. Ја почувствував силата на Кристи додека се трансформирав и беше неверојатно да се работи со толку одличен тим што ме подготви за оваа улога“, изјавила Свини за „Дедлајн“ по премиерата во Торонто.
На Инстаграм споделила како изгледа во новиот филм, сè „благодарение на папараците кои искокнуваа од грмушките и ја сликаа во новото издание“.
Погледнете ги и сцените од премиерата на филмот на фестивалот во Торонто:
