Полскиот тенисер Камил Мајчржак успеал да пронајде момче кое остана со скршено од срце откако возрасен навивач му го одзел качкетот што Полјакот му го дал како сувенир по неговата неверојатна победа на УС Опен, пренесе „Дејли мејл“.
По најголемата победа во неговата кариера против Карен Качанов во четвртокот, 29-годишниот Полјак го соблече качкетот и се обиде да го даде на едно момче во публиката. Меѓутоа, во грдата сцена што брзо стана вирална, мажот што стоел до момчето го грабнал качкетот и го ставил во неговата торба. Момчето остана разочарано, прашувајќи го: „Што правите?“, додека Мајчржак си одеше, несвесен за инцидентот.
Снимката предизвика бес на интернет, а корисниците на социјалните мрежи го нарекоа неидентификуваниот маж „себичен“ и „кретен“ затоа што на детето му украл незаборавен момент.
Потрага преку интернет
Мајчржак одлучи да ја исправи неправдата што му беше нанесена на момчето, објавувајќи на Инстаграм апел за помош во негово пронаоѓање. „По мечот не забележав дека мојот качкет не стигнал до момчето“, напиша тој. „Благодарение на@asicstennis, имам доволно качкети, па сум подготвен за тоа. Хеј луѓе, можете ли да ми помогнете да го пронајдам момчето од мојот меч? Ако тоа сте тоа вие (или вашите родители го гледаат ова), испратете ми порака“.
Само неколку часа подоцна, полската ѕвезда потврди дека потрагата била успешно завршена. Споделувајќи фотографии од инцидентот, тој додаде: „Импресиониран сум од моќта на интернетот. Успеавме! Сега сè е во ред“.
Најголема победа во неговата кариера
Овој трогателен расплет ги заокружи драматичните 24 часа за Мајчржак, чиј спортски подвиг веќе беше глава вест во Њујорк. Во четвртокот, тој покажа неверојатна упорност победувајќи го деветтиот носител Качанов со 2-6, 6-7(4), 6-4, 7-5, 7-6(5) во натпревар која траеше четири и пол часа, спасувајќи пет меч-топки.
Тоа беше негова прва победа над играч од топ 10 и се пласираше во третото коло на УС Опен. „Ова е најголемата победа во мојата кариера“, рече Мајчржак по натпреварот. „Покажува дека можам да се натпреварувам со најдобрите и ми дава толку многу самодоверба“, додаде тој.
Негова награда е натпревар во третото коло против швајцарскиот квалификант Леандро Риеди, 435 играч во светот. Доколку победи Мајчржак за прв пат во неговата кариера ќе се најде во осмина финале на Гренд слем.
