Во последните години, вештачката интелигенција („AI“) стана составен дел од користењето на интернетот, менувајќи го начинот на кој пребаруваме и проверуваме информации. Со нејзиниот постојан развој, присуството на алатките засновани на „AI“ сè повеќе расте, правејќи ги речиси секаде присутни. Во екот на туристичката сезона, „Kaspersky“ истражи колку често луѓето користат „AI“ за патувања и кои аспекти од подготовките им ги доверуваат на оваа технологија.

Кој ја користи „AI“ и зошто?

Истражувањето потврди дека вештачката интелигенција веќе е широко распространета меѓу активните интернет-корисници – 72% од испитаниците изјавиле дека барем еднаш користеле „AI“ сервиси. Кај лицата под 35 години тој процент достигнува дури 88%. Спротивно на тоа, постарата генерација (54+) е значително понеактивна – 54% имале контакт со „AI“, а 20% воопшто не покажуваат интерес да ја испробаат.

Најчеста примена на „AI“ е за истражување информации – 76% од учесниците го навеле тоа како главна причина. Следуваат деловната употреба (45%) и учењето (40%). Забавата (39%) и експериментирањето со технологијата (39%) се на четвртото место, додека патувањата сè уште се помал сегмент – само 28% ја користеле „AI“ за планирање на одмор или деловни патувања.

Иако бројот на оние што ја користеле „AI“ во патувањата е релативно мал, речиси сите (96%) изразиле задоволство: 44% го оцениле искуството како „совршено“, а 52% како „добро“. Дури 84% потврдиле дека ќе продолжат да се потпираат на „AI“ при идни подготовки, што укажува дека оваа технологија ќе стане уште поприсутна во туристичкиот сектор.

Како „AI“ помага при патувања?

За патниците, главната улога на „AI“ останува истражувањето. Дури 70% од оние што ја користеле во овој контекст ѝ довериле да најде настани и активности – екскурзии, туристички рути или продавници за сувенири. Дополнително:

• 66% ја користеле за избор на сместување,

• 60% составиле листа на ресторани,

• 58% барале карти преку „AI“.

Семејствата со деца ја користеле „AI“ значително почесто од оние без деца, што покажува дека технологијата им помага да заштедат време.

Во споредба со пребарувањето информации, резервирањето преку „AI“ е сè уште помалку популарно. Според податоците:

• 45% резервирале хотели преку „AI“,

• 43% купиле карти,

• само 38% резервирале ресторани.

Интересно е тоа што 45% од испитаниците се потпирале на „AI“ за прашања поврзани со визи и миграции – сегмент кој носи ризик. Еден актуелен пример е австралиски писател кој не можел да отпатува на конференција во Чиле поради погрешен совет за виза добиен од „ChatGPT“. Ова покажува дека ризиците од т.н. „AI халуцинации“ понекогаш ја надминуваат заштедата на време.

Трендови и предупредувања

„Некои од трендовите во користењето на вештачка интелигенција укажуваат на тоа дека нејзината улога во секојдневието брзо се менува. Луѓето го ценат своето време и преферираат персонализирани резултати. Оваа технологија веќе зрее и ги исполнува своите ветувања за подобро истражување и креативни идеи. Сепак, секогаш мора да се внимава на веродостојноста на податоците што ги нуди“, вели Владислав Тушканов, менаџер на група во „Kaspersky AI Technology Research Center“.

Совети од „Kaspersky“ за безбедни патувања:

• Секогаш проверувајте ги информациите добиени преку „AI“ пред да купувате или резервирате на веб-страници.

• При патување, не заборавајте на мобилен интернет во странство – размислете за користење „eSIM“ за да останете во контакт со семејството и пријателите.

• Проверете ги Wi-Fi мрежите пред поврзување, користете VPN и избегнувајте автоматско приклучување на непознати мрежи.

• Заштитете ги вашите уреди со силни лозинки и доверливо безбедносно решение.

Истражувањето е спроведено од „Kaspersky“ во соработка со истражувачката компанија „Toluna“ во текот на летото 2025 година. Анкетата опфатила 3.000 испитаници од 15 земји (Аргентина, Чиле, Кина, Германија, Индија, Индонезија, Италија, Малезија, Мексико, Саудиска Арабија, Јужна Африка, Шпанија, Турција, Велика Британија и Обединетите Арапски Емирати).