Новак Ѓоковиќ реши да ги прескокне Мастерсите во Торонто и Синсинати и најверојатно нема да има никаква посериозна подготовка за Ју-Ес Опен, турнир на кој ќе ја брка 25-та грен слем титула во кариерата.
Србинот последната титула на турнирите од големата четворка ја освои токму во Њујорк пред две години, па во ситуација кога не е фаворит за највисок дострел како порано, со интересна изјава се јави и неговиот сонародник, Душан Лајовиќ.
Популарниот Дуци смета дека ривалите сега повеќе веруваат во победа над Ѓоковиќ, а тоа е така поради физичките проблеми кои ги има Србинот во оваа подоцнежна фаза од неговата кариера.
– Играчите сега веруваат повеќе во победа над Ѓоковиќ. Ривалите чувствуваат дека тој не е надмоќен како порано. Од друга страна, гледаме дека Новак реши да одмори и приоритет стави на рекуперација на телото. За него е поважно да биде физички подготвен за втората фаза од турнирот, а не за првата.
– Не е лесно да се застане на терен после пауза од месец и половина, но за Ноле во овој случај поважно е да биде физички подготвен за втората недела во Њујорк.
– Најголема препрека за Новак оваа година беше физичката подготовка, тоа сите можевме да го видиме. Ако успее да парира физички, да игра во континуитет добро против играчи од топ 10, тој ќе биде фаворит еднакво како Синер и Алкарас. Синер и Алкарас изгледа дека физички се едно скалило погоре, но ако Новак заигра најдобро што може, тој е непобедлив. Би сакал да биде фит во текот на цел турнир, па да видиме до каде може да стигне еден 38-годишник против многу помлади тенисери, – изјави Лајовиќ.
