Комо потврди дека има амбициозен проект и потроши повеќе од 100 милиони евра за десетте засилувања кои ги донесе до воведната фаза на месец август, но после долги преговори, клубот од Италија успеа да го доведе и играчот кој е и најзвучно име.
Алваро Мората пристигна во слободен трансфер откако беше ослободен од Галатасарај и се откажа од огромна плата за да заигра за Комо, а фактот што тренер ќе му биде Сеск Фабрегас се очекува да биде негова предност во новата средина.
Фабре и Алваро ја делеа соблекувалната во Челси и шпанската фудбалска репрезентација, но сега се пред еден нов необичен и несекојдневен однос за нив, од кои ќе треба да учат и двајцата.
Тренерот на Комо најавува дека пријателството нема да игра никаква улога во влечењето потези, па Алваро го очекува третман како сите останати играчи во првиот тим.
– Сите се подготвени за првиот официјален меч, оној во Купот. Сите се на располагање, но ќе треба да донесам дополнителна одлука за Мората. Прво имаше добри тренинзи со Галатасарај, а потоа не тренираше со тимот и го правеше тоа самостојно.
– Повеќе не сме пријатели, сега ќе имаме професионален однос. Откако си замина од Челси, не зборувавме премногу, повремено си разменувавме љубезност, но тоа е тоа. Ако порано ми беше пријател, сега веќе не е така, се менува односот.
– Имаме одлична врска, делевме соблекувална и знам за каков човек се работи, но ќе гледам да го извлечам само она што може да го направи за тимот. Се откажа од 60 проценти од платата која ја добиваше во Турција и тоа кажува се за него. Тоа доволно говори за неговата глад и неговиот менталитет, – изјави Фабрегас.
