Овој индо-американски лекар, духовен учител и автор на бројни бестселери, нѐ потсетува: животот во изобилие не доаѓа однадвор – тој започнува одвнатре.

Што всушност значи изобилство?

„Изобилството е бесконечен потенцијал на креативност“, вели Чопра. „Тоа доаѓа од великодушноста на духот – не од сликата што ја имаме за себе, туку од нашето вистинско битие.“ Сликата за себе, објаснува тој, зависи од мислењето на другите: кој нè сака, кој нè не сака, кој е подобар, побогат, поуспешен. Во времето кога сè мериме со број на лајкови, трендови и статусни симболи, ја изгубивме врската со вистинскиот извор на задоволство.

Вистинската суштина на изобилството се огледува во љубовта, сочувството и поврзувањето со себеси. Тоа е состојба во која не сме инфериорни на никого, не се плашиме од ништо, отворени сме за реакции, но имуни на критики.

„Во таа состојба, ги добивате сите форми на изобилство“, истакнува Чопра, „и духовно и материјално.“ Во источните традиции, тоа е состојба во која се задоволени сите основни потреби – од безбедност и уживање, преку успех, љубов и креативно изразување, сè до интуиција и самоспознавање.

Како секое утро да повикаме изобилство?

Дипак Чопра нуди едноставна, но моќна пракса која може да се изведува секое утро – без телефон, апликации или аларм.

Негов совет е следниот:

„Кога ќе се разбудите, не посегнувајте веднаш за телефон. Седете мирно. Кажете си дека сакате да имате убав ден. Потоа, седете десет минути – не правете ништо. Почувствувајте присуство. Испијте кафе или чај полека, со внимание. Ако можете, излезете во парк, вдишете ја природата.“

Потоа, во тишина поставете си четири прашања:

• Кој сум јас? (Не се обидувајте да одговорите – само слушајте што се појавува: чувство, мисла, слика.)

• Што навистина сакам? (Кажете го тоа тихо на себе, внатрешно. Вашата душа веќе знае.)

• Која е мојата цел? (Насочете ја вниманието кон сврхата.)

• За што сум благодарен/благодарна? (Благодарноста ги отвора вратите кон свеста за изобилство.)

Започнете со пет минути дневно. Ако ви одговара – зголемете на десет, па дваесет. Чопра тврди: оваа пракса ќе ви го промени животот.

Идеална утринска рутина за живот во рамнотежа

Дипак Чопра ја открива и својата лична утринска и целодневна рутина, која ја смета за клучна за здравје, присутност и внатрешна хармонија:

Од 5 или 6 наутро па сè до 11 часот, тој медитира, шета, пие кафе, вдишува мирис на цвеќе, практикува јога. Вежба различни пози – седечки, стоечки, торзии, претклони… – бидејќи сè тоа го стимулира вагусниот нерв, клучен за лекување на телото. Потоа продолжува со дневните обврски, но во 17 часот престанува да работи. Навечер повторно се посветува на себе и на другите, медитира и оди на спиење пред 22 часот. Квалитетниот сон, вели, е одраз на внатрешниот мир.

Што всушност е исполнет живот?

Чопра заклучува едноставно:

„Единствената вистинска мерка на успех е – радоста.“

А за да ја почувствувате, доволно е да бидете присутни. Каде и да одите, со кого и да сте – внесете ја вашата внимателност. Зашто кога обрнувате внимание, објектот станува убавина, личноста станува љубов. И тоа е, како што вели, вистинската цел на животот.

Ако сакате да живеете во изобилство – започнете со тивко, смирено утро. Во свет кој брза, најрадикален чин е – да застанете. Да вдишете. Да бидете.