Во екот на сè погласните расправи за иднината на готовината, поттикнати од падот на нејзината употреба во секојдневните трансакции за време на пандемијата, Европската централна банка („ECB“) и Европската комисија ја потврдија својата посветеност на зачувување на готовината – пишува на официјалниот блог на „ECB“ Пјеро Чиполоне, член на управниот одбор на оваа институција.

Граѓаните сакаат кеш

Иако дигиталните плаќања во последните години бележат силен раст, побарувачката за готовина како средство за чување вредност и плаќање остана силна во сите возрасни групи, а истражувањата покажуваат дека Европејците сè уште сакаат да ја задржат можноста за плаќање во готово.

За да се обезбеди достапност и прифаќање на еврото во готово, Европската комисија во јуни 2023 година го претстави „Пакетот за единствена валута“. Тој содржи два клучни законодавни предлога: првиот се однесува на заштитата на статусот на евро банкнотите и монетите како законско средство за плаќање, додека вториот воспоставува правна рамка за воведување на дигиталното евро. Управниот одбор на „ECB“ ги поздрави овие предлози, истакнувајќи дека дигиталното евро, банкнотите и монетите ќе функционираат комплементарно, нудејќи им на граѓаните поширок спектар на можности за плаќање.

Надополнување, а не замена

Европските институции затоа уште еднаш јасно порачуваат дека дигиталното евро нема да ја замени физичката готовина, туку ќе ја надополни како нејзин „дигитален близнак“. Целта е да ги прошири предностите на готовината и во дигиталната сфера на плаќања. Достапноста на готовина во физички и електронски облик, и двете издадени од централната банка, ќе ја зајакне европската автономија во платниот систем, смета Чиполоне.

Оваа синергија ќе им овозможи на граѓаните да ги користат парите на централната банка за речиси сите видови плаќања, вклучувајќи ги и онлајн трансакциите. Истакнати се и предностите како зголемена безбедност, ефикасност, приватност и инклузивност. Со тоа, на потрошувачите во еврозоната ќе им се понуди сеопфатно решение за дигитално плаќање, независно од нивните банки.

Готовината останува клучна

Заклучокот на европските тела е дека готовината ќе задржи висока релевантност и ќе продолжи да постои паралелно со другите платежни средства. Особено се нагласува нејзината клучна улога во кризни времиња, кога таа може да ги задоволи основните потреби на граѓаните на начин што алтернативите не можат целосно да го заменат.

Затоа, потрошувачите во своите физички и дигитални паричници ќе можат да имаат банкноти, монети и дигитални евра, при што сите три опции ќе имаат статус на законско средство за плаќање, ќе бидат достапни во секое време и насекаде и прилагодени на различни потреби. „Пораката е недвосмислена: готовината останува со нас“, заклучи Чиполоне во својата објава.