Во конкуренција што вклучуваше фактори како што се времето, безбедноста, прегледите и густината на туристите, Париз се најде на врвот поради екстремно високата концентрација на посетители во мал градски простор.

И додека туристите често си заминуваат со поделени впечатоци, како всушност изгледа секојдневниот живот во овој познат европски град?

Високи секојдневни трошоци

Париз е меѓу најскапите градови во Европа. Според порталот „ParisRental“, месечните трошоци за живот за едно лице, без наем, се движат помеѓу 1.064 и 1.314 евра. Цената за изнајмување на еднособен стан со една спална соба во центарот достигнува од 1.500 до 2.500 евра, додека вкупните месечни трошоци за живот лесно надминуваат 3.000 евра

И покрај стереотипот дека животот во Европа е поевтин, Американка која се преселила од Њујорк изјавила за странските медиуми дека нејзините трошоци во Париз не биле ништо пониски. „Мојата плата беше една третина од она што го заработував во САД, но трошев речиси исто“, рекла таа.

Минималната плата во Франција е околу 1.500 евра месечно за 35-часовна работна недела, додека просечната годишна плата е околу 27.000 евра.

Наем

Кириите во популарните населби како Маре или Латинскиот кварт достигнуваат повеќе од 2.500 евра месечно.

Просечната цена по квадратен метар за купување стан е 10.400 евра, што е пониско отколку во Лондон или Њујорк, но сепак прескапо за многумина.

Здравствена заштита: високи стандарди, но и високи трошоци

Францускиот здравствен систем ужива репутација како еден од најдобрите во светот. Сепак, специјалистичките услуги понекогаш можат да изненадат со својата цена.

Дерматолошки преглед чини околу 100 евра, а гинеколошки преглед чини 120 евра. Државното осигурување покрива околу 70 отсто од трошоците, а остатокот го сноси пациентот. Преглед кај матичен лекар чини просечно 30 евра, од кои околу 21 евро му се враќаат на пациентот.

Интеграција: процес кој трае

Париз не е град што лесно прифаќа странци, се согласуваат многу иселеници. Австралијката Меган Клемент откри како волонтирањето во локален бар ѝ отворило врата кон заедницата. „Не очекував дека тоа ќе ми го промени животот, но го тоа се случи. Тоа беше мојот пат кон пријателства, јазик и кариера“, изјави таа за „Гардијан“.

Иселениците често им советуваат на потенцијалните жители да се приклучат на групи на социјалните медиуми како што е Фејсбук, да побараат специјализирани агенции за изнајмување и да го научат јазикот пред да се преселат.

Јавен превоз и градска инфраструктура

Париз има еден од најразвиените системи за јавен превоз во Европа. Метрото, RER и трамваите го олеснуваат движењето низ градот и регионот Ил – де Франс. Месечната карта чини околу 90 евра. Иако системот е функционален, многумина се жалат на пренатрупаност, бучава и повремени штрајкови.

Култура, секојдневен живот и слободно време

Париз нуди бројни можности за културно и социјално исполнет живот. Ручекот во ресторан чини околу 20-30 евра, а билетите за музеи се движат од 15 до 18 евра. Многу жители претпочитаат да шетаат покрај Сена, да прават пикници во парковите Бјут-Шомон или да вечераат во помали, квартовски барови. Месечните трошоци за забава и слободно време (кино, теретана, излегување) во просек изнесуваат 300-400 евра.

Парискиот работен ритам е побавен отколку во другите европски метрополи. Работната недела трае 35 часа, а август традиционално е месец на одмор кога многу жители го напуштаат градот.

Во тој период продавниците и малите бизниси честопати ги затвораат своите врати.

Туризам и локален отпор

Прекумерниот туризам стана видлив проблем во некои делови од градот, особено во Монмартр. По Олимписките игри во 2024 година, локалните жители се жалеа на губењето на идентитетот во населбата, зголемувањето на цените и метежот. Групата „Vivre à Montmartre“ го повика градскиот совет да преземе построги мерки против претворањето на становите во туристички сместувачки капацитети.

„Монмартр повеќе не е наш“, изјави една жителка за Ројтерс. „Тој е претворен во кулиса за социјалните мрежи, а ние губиме простор за секојдневниот живот“, додаде таа.

Париз, иако зрачи со култура, историја и елеганција одвнатре е комплексен град полн со контрасти. За жителите и странците, животот таму може да биде подеднакво инспиративен и предизвикувачки.