Наведената мисија на „Tesla“ отсекогаш била производство на ценовно достапни електрични возила. Идејата, зацртана во главниот план на Илон Маск, била да се започне со ултрапрофитабилни луксузни автомобили, а потоа долгорочно да се развиваат поевтини модели.
Меѓутоа, првичниот основач и извршен директор на „Tesla“, Мартин Еберхард, јавно изрази незадоволство од одлуката на Маск да даде приоритет на „Cybertruck“, за кој вели дека „изгледа како контејнер за ѓубре“, и на „Robotaxi“ наместо на евтино електрично возило за масите, пишува „InsideEVs“.
Основачот на „Tesla“: „Направија пикап што изгледа како контејнер за ѓубре“
Името на Мартин Еберхард е познато на долгогодишните обожаватели на „Tesla“. Тој, заедно со Марк Тарпенинг, е еден од двајцата првични ко-основачи на компанијата. Бил сменет од позицијата извршен директор во 2007 година, а по правна битка, на Еберхард, Тарпенинг, Илон Маск, Иан Рајт и Џ.Б. Страубел им било дозволено да се нарекуваат „основачи“.
Визијата на Еберхард била масовно производство на евтино електрично возило, додека визијата на Маск се темелела на вертикална интеграција на компанијата. Најновиот конфликт се однесува на одлуката за производство на „Cybertruck“ наместо на достапен автомобил.
Во неодамнешно интервју, Еберхард изјави: „Јас би работел на нискобуџетен автомобил затоа што сега би требало да можеме да го направиме тоа. Всушност, сум разочаран што „Tesla“ го откажа својот програм за нискобуџетни автомобили, бидејќи тоа е она што му треба на светот, а не пикап што изгледа како контејнер за ѓубре.“
Критиката на Еберхард не е насочена кон дизајнот, туку кон правецот во кој се движи „Tesla“. Програмата за евтин автомобил на која се повикува најверојатно е моделот од 25.000 долари, кој Маск наводно го откажал минатата година.
Наместо тоа, „Tesla“ планира да понуди попристапна верзија на „Model Y“ со помалку опрема. Иако деталите не се познати, малку е веројатно дека цената ќе биде близу до 25.000 долари. Еберхард исто така е скептичен кон „Robotaxi“.
„Сметам дека е прилично неверојатно дека можете да ставите прототип на нешто на пат и понекогаш да убивате луѓе затоа што не функционира правилно. И тоа е некако во ред? За мене не е“, рече тој. Се чини дека потрошувачите сакаат евтини и практични електрични возила, а не контроверзни модели како „Cybertruck“.
