Американскиот претседател Доналд Трамп изјави дека веројатно ќе побара од Иран да ја суспендира својата нуклеарна програма за време на разговорите следната седмица, додавајќи дека американските напади врз Иран брзо ја завршија војната меѓу Израел и Техеран.
Трамп рече дека неговата одлука да употреби бомби за уништување бункери во нападот во неделата ја уништила нуклеарната програма на Иран, додавајќи дека тоа е „победа за сите“.
„Тоа беше тотално уништување“, уверува американскиот претседател отфрлајќи ја првичната проценка на Агенцијата за одбранбено разузнавање на САД (DIA) дека на Иран ќе му требаат само неколку седмица за да ја обнови својата нуклеарна програма.
Трамп изјави на самитот на НАТО во Хаг дека не мисли дека Иран повторно ќе се обиде да развие нуклеарно оружје. Техеран со децении ги негира обвинувањата на западните лидери дека се стреми кон нуклеарно оружје.
„Следната седмица ќе разговараме со Иран. Можеби ќе потпишеме договор. Не знам. Не мислам дека тоа е потребно“, рече Трамп.
Директорот на Централната агенција за разузнавање (CIA), Џон Ратклиф, подоцна изјави дека доверливите разузнавачки информации покажуваат дека нуклеарната програма на Иран претрпела значителна штета во неодамнешните американски напади, но не кажа дека е уништена.
„Новите разузнавачки информации од историски сигурен и точен извор/метод покажуваат дека неколку клучни ирански нуклеарни објекти се уништени и ќе бидат потребни години за нивна обнова“, рече Ратклиф.
Израелската нуклеарна агенција процени дека нападите „ја вратиле способноста на Иран да развие нуклеарно оружје за многу години“. Белата куќа, исто така, пренесе израелска проценка, иако Трамп рече дека не се потпира на израелските разузнавачки информации.
Трамп рече дека е уверен дека Техеран ќе продолжи да се стреми кон дипломатски патишта кон помирување. Тој не даде детали за тоа каде ќе се одржат разговорите следната недела или кој ќе учествува.
Доколку Иран се обиде да ја рестартира својата нуклеарна програма, „ние нема да го дозволиме тоа“, рече тој.
