Иако претходните гласини беа неусогласени, нови индиции доаѓаат токму од "Samsung". Компанијата најави серија настани во рамки на "Samsung Health", наменети за тркачи и корисници на "Galaxy" носливи уреди. Интересно е што тие настани почнуваат токму во Њујорк на 13 јули.

Инаку, премиерите на преклопните телефони претходните години се одржуваа подоцна – кон крајот на јули или дури во август.

Локацијата се совпаѓа со гласините, а датумот одговара на најновите предвидувања – дали тоа значи дека "Unpacked" ќе се одржи на 13 јули или околу тој датум? Можно е, но засега сè останува во рамки на шпекулации.

Официјални покани сè уште нема.

Што знаеме за "Galaxy Z Fold 7" и "Galaxy Z Flip 7'?

Кога станува збор за самите телефони, сè уште се работи за неофицијални информации и гласини.

• "Galaxy Z Fold 7" наводно ќе донесе значајни хардверски подобрувања, вклучувајќи ултра-тенок дизајн, екран поголем од 8 инчи кога е расклопен, нова генерација на камери со сензор до 200 MP, како и врвен "Snapdragon 8 Elite" чипсет.

Се очекува и подолготрајна батерија, како и поиздржлив механизам за преклопување.

• "Galaxy Z Flip 7", од друга страна, најверојатно ќе добие поголем надворешен екран со дијагонала од околу 4 инчи, додека внатрешниот ќе достигне до 6,85 инчи.

Во одредени региони, вклучувајќи Европа и делови од Азија, "Flip" моделот би можел да користи "Samsung Exynos 2500" чипсет, додека американската верзија ќе остане на "Snapdragon".

Се очекува и "Flip" моделите годинава да стартуваат со 12 GB RAM и минимум 256 GB внатрешна меморија.

Покрај преклопните телефони, "Samsung" би можел да ги претстави и новите "Galaxy" паметни часовници од серијата 8, како и иновативен "AR/XR headset", кој се развива под кодно име "Project Moohan".