Во изминатите неколку недели, директори на неколку технолошки компании повеќепати предупредија на опасностите од вештачката интелигенција – пред сè на нејзиното потенцијално негативно влијание врз пазарот на труд. Отказите поради "AI" не се мит – тие веќе се случуваат во компании ширум светот, и може да се претпостави дека имплементацијата на оваа технологија, паралелно со отпуштањата или замрзнувањето на вработувањата, ќе продолжи и во иднина.

На тоа неодамна предупреди и Даниел Амодеи, поранешен вработен во "OpenAI" и актуелен директор на "Anthropic AI", кој ги повика политичарите и директорите да не ја разубавуваат моменталната состојба, бидејќи пазарот на труд, како што рече, се соочува со „крвопролевање“. Најпогодени ќе бидат т.н. „white collar“ позиции – административни, канцелариски и интелектуални работни места – каде што "AI", особено за почетнички позиции, би можела да елиминира и до половина од работните места.

За жал, не гледам како би можеле да го избегнеме тоа

Не се загрозени само почетничките, туку речиси сите позиции. Како што предупреди и извршниот директор на "Klarna" во еден поткаст минатата недела, тоа може да доведе до рецесија. Според него, намалувањето на бројот на вработени – од административни позиции, преку сметководители, до ИТ стручњаци – обично предизвикува рецесија, што, според него, нè очекува и сега.

„За жал, не гледам како тоа би можело да се избегне, гледајќи од технолошка перспектива“, изјави Себастијан Семијатковски.

Дека "AI" може да ги замени луѓето, но и дека луѓето сè уште се посоодветна работна сила, покажува токму примерот на неговата компанија. "Klarna" почна интензивно да ја користи оваа технологија, а Семијатковски првично се пофали дека нивните "AI"-четботови можат да ја завршат работата на дури 700 луѓе – поради што започнале да отпуштаат и престанале со нови вработувања, што доведе до значително намалување на бројот на вработени.

Сепак, неодамна го смени мислењето – истакнувајќи дека нивото на задоволство кај клиентите со "AI" не е на потребното ниво, па компанијата повторно ќе се сврти кон луѓето. Иако "AI" и понатаму ќе одговара на дел од прашањата, Семијатковски нагласи дека за оние кои сакаат човечко искуство во корисничката поддршка – вработените на "Klarna" ќе останат достапни.

Дополнително, најави дека ќе користат луѓе како дел од т.н. „VIP корисничка поддршка“ – односно, корисниците кои ќе плаќаат повеќе, ќе имаат можност да разговараат со вистински вработени наместо со вештачка интелигенција.

Додека многумина се песимисти, а Семијатковски вели дека сака да биде искрен и да зборува отворено за да може општеството навреме да се подготви, некои – како Сундар Пичај – се доста оптимистички. Директорот на "Alphabet" и "Google" верува дека нема причина за страв од откази поради "AI", бидејќи оваа технологија, според него, всушност ќе ја зголеми побарувачката за работна сила.