Се случува нешто чудно и впечатливо на површината на Сонцето. Широка црна празнина во форма на уста зјае кон остатокот од Сончевиот систем. Станува збор за огромна коронална дупка широка колку пет Јупитерови планети. Над таа „уста“ се појавиле и „очи“.

Иако изгледа како вистинска дупка, станува збор за област со намалена магнетна активност на површината на Сонцето, што овозможува брзите соларни ветрови да исфрлат честички во вселената. За разлика од сончевите пеги, овие дупки не се видливи во обична светлина, туку се појавуваат како темни области во екстремниот ултравиолетов спектар поради постудената и поретка плазма. Сликите од ова „лице“ на Сонцето ги објави НАСА.

Во моментот, Сонцето прикажува впечатлива илузија: две коронални дупки налик на очи на северната хемисфера и една широка дупка во форма на уста на јужниот дел. Секое „око“ е приближно големо колку Јупитер, а сите три коронални дупки активно исфрлаат соларни честички низ Сончевиот систем.

Соларните ветрови кои произлегуваат од овие дупки можат да предизвикаат геомагнетни бури кога ќе се судрат со Земјиното магнетно поле, но тие обично не се силни. За разлика од избувнувањата на коронална маса (CME), кои се експлозивни и силно влијаат врз Земјиното магнетно поле, ветровите од короналните дупки генерално се поблаги.

Растечка соларна активност

Според Британската метеоролошка служба, следното можно засилување на брзите ветрови доаѓа од короналната дупка на јужниот дел од соларниот диск. Сепак, проценката е со мала сигурност и најверојатно ќе дојде до слаба интеракција со Земјиното магнетно поле поради локацијата на дупката. Сепак, се очекува период на засилени соларни ветрови, додаваат од британската служба.

Само пред неколку дена, Земјата беше погодена од силна геомагнетна бура од ниво "G4", предизвикана од "CME" активност. Како што Сонцето се приближува кон врвот на својот 11-годишен циклус, научниците очекуваат зголемена активност – а можеби и уште повеќе вакви чудни лица на Сонцето.

Засега, ова останува спектакл, а не закана.