Нутриционистката Милка Раичевиќ го сподели својот совет за правилно миење на овошјето.
Иако повеќето луѓе веруваат дека знаат како да го измијат овошје пред јадење, вистината е дека речиси никој не го прави тоа правилно. Брзото плакнење под млаз вода, што стана вообичаена практика, всушност воопшто не е доволно за да се отстранат сите нечистотии, пестициди, па дури и ситни црви што можат да влезат во овошјето.
Нутриционистката Раичевиќ предупреди дека овој невнимателен пристап е доста ризичен и откри како треба да изгледа целиот процес на миење.
„Овошјето пред сè мора добро да биде измиено. Прво, треба да се стави под млаз вода, потоа да се натопи, и да отстои 15-20 минути. Па така, доколку има црви, тие ќе испливаат. После тоа, треба повторно да се измие и можеби да се стави во сода бикарбона, но и не мора, и дури тогаш може да се консумира“, објасни нутриционистката за порталот „Среќна“.
Овој совет изгледа едноставен, но малкумина го практикуваат. Токму затоа многу луѓе несвесно ги внесуваат остатоците од пестициди и бактерии што остануваат на кората од овошјето. Особено е важно темелно да се мијат овошјата што се јадат со кора, како што се јаболка, јагоди, цреши и слично.
Иако сода бикарбона понекогаш се користи како дополнителна заштита, нутриционистката истакна дека не е неопходна ако овошјето веќе е темелно измиено и натопено. Суштината е во трпението, овошјето не треба да се мие набрзина, туку да му се посвети неколку минути повеќе внимание, бидејќи така го заштитуваме нашето здравје.
Доколку овошјето не се измие правилно, постои сериозен ризик од внесување штетни микроорганизми како што се ешерихија коли и салмонела, кои можат да предизвикаат стомачни тегоби, повраќање, дијареја, па дури и сериозни инфекции кај почувствителните лица. Остатоците од пестициди можат да имаат долгорочно негативно влијание врз хормоните, плодноста и општата здравствена состојба. Затоа, следниот пат, пред да загризете јаболко или јагода, сетете се на советот на нутриционистката.
