[ФОТО] Полувековна мистерија: Леонардо да Винчи има најмалку шест живи потомци

Истражувањето, кое го документира семејното стебло од 1331 година, опфаќа 21 генерација и повеќе од 400 поединци.

Анализата открила дека делови од „Y“ хромозомот – што се користат за индивидуална идентификација – се совпаѓаат меѓу себе, со што се потврдува генетската континуираност на машката линија на семејството Да Винчи, почнувајќи од 15. генерација.

Преку анализа на историски извори и архивски документи, авторите идентификувале 15 потомци по директна машка линија – денешни роднини на таткото и полубратот на Леонардо, пренесува „Ansa“.

Ова им овозможило на Давиде Карамели, претседател на музејскиот систем на Универзитетот во Фиренца и координатор на проектот за антрополошките и молекуларни аспекти, и на Елена Пили, форензичка антропологинка, да подложат шестмина од нив на ДНК тестирање кое ја потврдило генетската врска преку машката линија на семејството Да Винчи.

Дополнително, е потврдено постоењето на можна семејна гробница во црквата „Санта Кроче ин Винчи“, во близина на Фиренца – родното место на уметникот – која моментално е предмет на археолошки ископувања во соработка со Универзитетот во Фиренца.

Се претпоставува дека таму можеби се погребани и дедото на Леонардо, Антонио, неговиот чичко Франческо, како и неговите полубраќа Антонио, Пандолфо и Џовани.

Следниот чекор е споредба на ДНК од овие посмртни остатоци со ДНК на луѓето за кои се претпоставува дека се живи потомци на Леонардо.