Доналд Трамп на „Фокс њуз“ коментираше за дијагнозата рак на простата на поранешниот претседател Џо Бајден, изразувајќи сочувство, но исто така наведувајќи дека целата ситуација треба да се истражи. Тимот на Бајден во неделата попладне објави дека поранешниот претседател бил подложен на тестови поради зголемени проблеми со мокрење, а лекарите откриле нов јазол на неговата простата.
„Во петокот, му беше дијагностициран рак на простата со Глисонов резултат 9 (група 5) со коскени метастази“, се вели во соопштението. „Иако станува збор за поагресивна форма на болеста, туморот се чини дека е чувствителен на хормони, што овозможува ефикасни третмани“, се заклучува во извештајот. „Претседателот и неговото семејство разговараат за опциите за лекување со своите лекари.“
Trump on Biden's cancer diagnosis: "I'm surprised that the public wasn't notified a long time ago, because to get to stage 9, that's a long time ... I did a very complete physical, including cognitive tests. I'm proud to announced I aced it." pic.twitter.com/6mk3bGszAm
— Aaron Rupar (@atrupar) May 19, 2025
Трамп вчера попладне пред новинарите ја нарече веста „навистина тажна“.
„Изненаден сум што јавноста не беше информирана за ова многу порано, бидејќи ако веќе е деветта фаза, тоа значи дека долго време се чекало“, рече Трамп. „Тукушто бев на преглед. Имавме лекари од Белата куќа и од болницата „Волтер Рид“, што е фантастично. Имав темелен преглед, вклучувајќи и когнитивни тестови. Со гордост објавувам дека ги поминав без проблем.“
Трамп повторно се осврна на она што го тврди како когнитивен пад на Бајден за време на неговиот мандат, велејќи дека „секој што се кандидира за претседател треба да полага когнитивен тест“.
„Велат дека е неуставно. Но, во овој конкретен случај, мислам дека тестот за когнитивни способности не би бил лоша работа“, рече Трамп. Тој, исто така, посочи дека јавноста не била навремено информирана за здравствената состојба на Бајден и побара истрага.
„Мислам дека некој треба да разговара со својот лекар или лекари“, рече Трамп. „Зошто не се зборуваше за когнитивните способности? И колку што се сеќавам, докторот рече дека сè е во ред. А сега се испостави дека не е. Тоа е многу опасно.“ Тој заврши велејќи дека дијагнозата за рак е „многу, многу тажна ситуација“ и додаде дека „навистина му е жал за тоа“.
„Мислам дека луѓето треба да се обидат да откријат што се случило бидејќи не знам дали има некаква врска со болницата“, рече Трамп. „Волтер Рид е навистина одлична болница. Некои од најдобрите лекари што сум ги видел работат таму. Некој не ја кажува вистината. Тоа е голем проблем“, заклучи тој.
Веста за агресивната форма на рак дијагностицирана кај 82-годишниот Бајден ја шокираше земјата за време на викендот. Откако доби пораки за поддршка од сите страни, Бајден вчера им се заблагодари на своите следбеници на социјалните мрежи.
„Ракот нè погодува сите“, напиша Бајден на платформата X. „Како и многумина од вас, Џил и јас научивме дека сме најсилни кога сме скршени. Ви благодариме за вашата љубов и поддршка.“
