Парк во централна Јапонија во префектурата Шизуока има површина од само 0,24 квадратни метри, а Гинисовата книга на рекорди го прогласи за најмал во светот.
Површината на паркот е толку мала што само едно лице може да седи во него на дрвено седиште на карпа, објави „Кјодо“.
Паркот се наоѓа на крајот од станбена зона во градот Нагаизуми и содржи мали растенија до седиштата и два камени споменици, од кои едниот прикажува цвет што го симболизира градот.
Мештаните го нарекувале „најмалиот парк во светот“ и го негувале како место за одмор повеќе од 30 години, пред официјално да биде признаен од Гинис како најмал парк во светот во декември.
Паркот се наоѓа на околу 300 метри од градското собрание, а е изграден во 1988 година со користење на земјиште останато од градежните работи на патот.
Поранешен градски службеник предложил формирање мал парк откако бил инспириран од паркот Мил Ендс во американската држава Орегон, кој има површина од 0,29 квадратни метри.
Откако го доби признанието од Гинисовата книга на рекорди, паркот стана популарна туристичка атракција.
