Се вели дека парите можат да купат сè, но едно големо меѓународно истражување покажа дека парите не можат да купат или гарантираат подолг живот. Барем не кога станува збор за Американците, односно за нивните најбогати слоеви на општеството. Еве зошто.
Голема меѓународна студија откри отрезнувачки факт: дури и богатите Американци имаат поголема веројатност да починат порано од Европејци со сличен, па дури и понизок, финансиски статус.
Истражувањето, објавено во списанието "New England Journal of Medicine", ги анализирало здравствените и пензиските податоци на 73.838 лица на возраст од 50 до 85 години во периодот од 2010 до 2022 година. Учесниците биле поделени во четири квартали според богатството, и тоа во САД и Европа. Во сите групи, Американците имале значително повисоки стапки на смртност, покажуваат резултатите.
Истото богатство не значи и иста заштита
Подобрувањето на здравствените исходи не е предизвик само за финансиски најранливите – погодени се и оние во горниот квартал на богатството, вели Сара Мачадо, здравствена економистка од Универзитетот Браун и водечки автор на студијата.
Иако богатството генерално го намалува ризикот од смртност на двата континента, јазот во преживувањето помеѓу најбогатите и најсиромашните бил многу поголем во САД. Американците од сите економски слоеви имале полоши резултати од Европејците.
Разликите во здравствената заштита одат во корист на Европа
Авторите на истражувањето го припишуваат овој европски „бонус“ на универзалниот пристап до здравствена заштита, посилните системи на социјална сигурност и покохезивните општествени структури. Во земји како Франција, Германија и Холандија, дури и најсиромашните граѓани живееле подолго од најбогатите Американци.
Овие откритија се јасен потсетник дека дури ни најбогатите Американци не се заштитени од системските проблеми во САД кои придонесуваат за пократок животен век, како економската нееднаквост или фактори на ризик како стрес, лоша исхрана или опасности од животната средина, истакнува Ирена Папаниколас од Универзитетот Браун, исто така коавторка на студијата.
Комбинираната стапка на смртност во сите квартали била 40% пониска во северна и западна Европа отколку во САД.
Ако сакаме да го подобриме здравјето во САД, мора подобро да ги разбереме основните фактори кои придонесуваат за овие разлики – особено меѓу социоекономски слични групи – и зошто тие водат до различни здравствени исходи меѓу нациите, заклучува Папаниколас.
