Карлос Саинц нема по добро да ги памети првите три тркачки викенди во новата сезона, а особено не овој во Јапонија кој заврши со главната трка рано утрово на Сузука.
Шпанскиот возач има далеку поинакви цели и амбиции во сезоната во која ги брани боите на Вилијамс, па иако денеска на трката изведе и неколку престигнувања, сепак Карлос остана далеку од првата десетка.
Саинц заврши на 14-то место и „заглави“ во метежот поради лошата стартна позиција која ја имаше, но катастрофалниот викенд во Јапонија му донесе и неповолна вест по неговиот „џеб“, бидејќи ФИА реши да му изрече казна неколку часа по возбудувањата.
DOC 49 - Infringement - Car 55 - Late attendance of National Anthem https://t.co/nVLPv627jK #JapaneseGP #F1 #FIA pic.twitter.com/l4NIbvPqv1
— FIA (@fia) April 6, 2025
Карлос заработи казна од три места на саботните квалификации поради некоректен потег во ситуација кога беше пред Луис Хамилтон, додека денеска доби казна од највисоката инстанца во мото-спортот.
ФИА му изрече казна од 20 илјади евра на Саинц поради тоа што задоцнил на традиционалното интонирање на химната пред стартот на трката, потег кој од водечките луѓе е оценет како јасно непочитување кон организаторот и земјата домаќин на гран-при викендот.
Од изречените 20 илјади евра, Саинц 10 ќе мора да исплати веднаш, а 10 се условни и нема да смее да повтори нешто слично во наредните 12 месеци.
