Кен Мекалум, генерален директор на МИ5, зборувал за јазот помеѓу реалноста и фикцијата во шпионажата, истакнувајќи дека додека некои ТВ емисии и филмови нудат драма, вистинската разузнавачка работа вклучува обични луѓе кои прават извонредни работи.

Изложбата „МИ5: Службени тајни“ била подготвувана во текот на неколку години од архиварите на агенцијата, во соработка со британскиот национален архив, за да им се даде можност на луѓето да ја видат опремата што ја користеле шпионите, рекол Мекалум.

Еден од презентираните предмети е лимон стар 110 години, кој бил користен како доказ против германскиот шпион Карл Милер, кој бил погубен во 1915 година во лондонската кула.

Мулер, шпион кој се преправил во руски брокер и тајно допатувал во Англија меѓу бегалците во 1915 година, користел пенкало натопено во лимон за пишување невидливи пораки на своите колеги. Своите тајни ги пренесувал меѓу линиите на обичното мастило, инаку незабележливи букви со голо око.

Но, маската на Мулер паднала кога агент на Бирото на британската тајна служба – сега познат како МИ5 – со пегла преминал преку писмото што го испратил во 1915 година, поради што се појавило невидливото мастило од лимон. Лимонот бил пронајден во џебот од палтото на Мулер во моментот на апсењето и станал клучен доказ во случајот против него. Тој бил застрелан во лондонската кула.

Судењето и егзекуцијата на Мулер биле чувани во тајност од јавноста за британските агенти да можат продолжат да ги користат неговите методи и за да се претставуваат како него и да испраќаат лажни информации до германските разузнавачки единици.

Лимоновото невидливо мастило – Пронајдокот на Да Винчи

Сокот од лимон со векови се користел како форма на „невидливо мастило“, бидејќи не може да се види на хартија додека не се загрее.

Практиката датира барем од ренесансата, кога уметникот-пронаоѓач Леонардо да Винчи комбинирал сок од лимон со млеко за да напише невидливи пораки.

Некои низ историјата експериментирале со други киселини или алкални материи, вклучувајќи урина, оцет, сок од кромид, сок од други агруми и сперма.

Сокот од лимон и грејпфрутот понекогаш се користеле и за време на американската војна за независност.

Невидливото мастило направено од сок од портокал било клучен дел од злогласниот „Барутен заговор“ од 1605 година, кога неколку англиски римокатолици, гневни од религиозното прогонство, направиле заговор да го убијат кралот Џејмс I и да го разнесат Парламентот. Не успеале, но писмата разменети меѓу членовите на подземното католичко движење од тоа време откриле бројни употреби на портокалово мастило.

Изложбата вклучува признанија од најозлогласените двојни агенти во Велика Британија, познати како „петорка од Кембриџ“, како и извештаи за надзор од Доналд Меклин и Гај Берџес, кои нудат увид во некои од најзначајните случаи на шпионажа во 20 век.

„Од основањето на МИ5 како тим со два офицери до денес, 115 години ја штитиме Велика Британија од најсериозните закани за нашата национална безбедност. Таа главна мисија и вредностите кои се во нејзината основа не се променија многу“, рекол Мекалум.