Речиси 20 години, жителите на главниот град на Северна Кореја секое утро се будат со страшна мелодија која одекнува низ улиците. Овој звучен аларм, кој стана препознатлив дел од секојдневниот живот во Пјонгјанг, започнал во 2008 година и оттогаш редовно се пушта во шест часот наутро.
Звукот станал толку доминантен што на многу жители им е речиси невозможно да побегнат од него.
Демократска Народна Република Кореја, позната по своето тоталитарно владеење под династијата Ким, е позната по своите контроверзни и необични практики. Песната која секое утро им се пушта на жителите на главниот град Пјонгјанг е дел од создавањето на атмосферата под власта на Ким Џонг Ун. Во оваа диктаторска земја, мелодијата не е само повик за будење, туку и симбол на владејачкиот режим.
Актерот Мајкл Пејлин, од Монти Пајтон, ја посетил Северна Кореја во 2018 година и го снимил звучниот феномен, опишувајќи го како најчудниот начин на будење.
Неговата реакција беше дека песната е толку вознемирувачка што од неа не може да се побегне. Спотот бил снимен пред шест години, а последниве денови повторно станал актуелен на социјалните мрежи, каде луѓето коментираат дека песната звучи како нешто од кошмар.
„Ова е како кошмар“, „Истата атмосфера што ја чувствувам во моите соништа“ и „Прилично е морничаво, замислете имате парализа при спиење, а ова свири“, биле дел од коментарите на корисниците на ТикТок.
Песната која секое утро одекнува низ Пјонгјанг се вика „Каде си, драг генерале?“ а најверојатно е компонирана од Ким Јонг Ил во 1971 година како дел од операта „Вистинската ќерка на партијата“. Во операта, воената медицинска сестра Канг Џеон-ок го изразува својот сон да го запознае Ким Ил Сунг, таткото на Ким Јонг Ил и „основачот“ на Северна Кореја.
