На 71-годишна возраст почина Џуниор Бриџмен, поранешен НБА кошаркар и успешен бизнисмен.
Според „New York Post“, тој доживеал срцев удар за време на хуманитарен настан во Луисвил, каде што почувствувал болки во градите.
Бриџмен имал забележителна кошаркарска кариера, а одиграл 12 сезони во НБА лигата, најмногу за Милвоки Бакс, каде што беше повлечен неговиот дрес со број 2.
Џуниор бил осмиот избор (пик) на НБА драфтот во 1975 година, од страна на Лос Анџелес Лејкерс, но набрзо бил разменет во Милвоки Бакс во замена за Карим Абдул-Џабар.
За време на неговата 12-годишна кариера во НБА лигата, од кои девет сезони поминал во Бакс, тој просечно постигнувал 13,6 поени по натпревар. Неговиот дрес со број 2 бил повлечен во 1988 година, како признание за неговиот придонес во тимот.
We are shocked and saddened by the tragic passing of Bucks legend and owner Junior Bridgeman. We send our deepest condolences to his family. pic.twitter.com/XakoTcDeF5
— Milwaukee Bucks (@Bucks) March 11, 2025
По завршувањето на спортската кариера, Бриџмен изградил импресивна деловна империја. Почнувајќи со инвестиции во ресторани за брза храна, тој поседувал повеќе од 450 ресторани, вклучувајќи ги и франшизите „Wendy’s“ и „Chili’s“.
Подоцна го проширил својот бизнис во други сектори, вклучувајќи го купувањето на фабрика за флаширање на Кока-Кола и преземањето на магазините „Ebony“ и „Jet“, со што стекнал богатство проценето на 1,4 милијарди долари, што го направи вториот најбогат НБА играч, веднаш зад Мајкл Џордан, чие богатство се проценува на 2,1 милијарди долари.
Животот и кариерата на Бриџмен служат како инспирација за многумина, демонстрирајќи како спортскиот успех може да се пренесе во деловниот свет. Неговиот придонес за заедницата и светот на бизнисот ќе остане запаметен како пример за посветеност и визија.
