Партиите што се залагаат за независност освоија најмногу гласови на изборите во Гренланд.
Опозициската партија од десниот центар, која се залага за постепено прогласување независност на Гренланд, освои најмногу гласови на парламентарните избори на најголемиот остров во светот.
Според Би-Би-Си, доминантна тема на вчерашните избори била изјавата на американскиот претседател Доналд Трамп, кој најави дека САД сакаат да ја преземат контролата врз оваа автономна територија на Данска.
По преброени 90 отсто од гласовите, се дознава дека партијата Демократи добила речиси 30 проценти поддршка.
На второ место е партијата Налерак со околу 25 проценти од гласовите. Оваа партија, исто така, е во опозиција и се залага за веднаш започнување на процесот на одвојување од Данска и воспоставување поблиски врски со САД.
Партијата Инуитски Атакатигит (ИА) на поранешниот премиер Муте Б. Егеде, која исто така поддржува независност, се најде на третото место со повеќе од 21 процент од гласовите.
Британскиот медиумски сервис потсетува дека Гренланд, овој џиновски остров со површина од речиси три милиони квадратни километри, е под контрола на Копенхаген веќе 300 години.
Локалните власти имаат овластувања да управуваат само со внатрешната политика, додека одлуките поврзани со надворешната политика и одбраната ги носи Данска.
Право на глас имаа околу 44.000 Гренланѓани од вкупно 57.000 жители на островот.
Тие избраа 31 член на локалниот парламент и нова влада, а на гласачкото ливче беа застапени шест партии.
Партијата Сиумут, која досега беше дел од коалициската влада предводена од премиерот Егеде, заврши на четвртото место со нешто помалку од 15 проценти од гласовите.
Останатите две партии, Атасут и Кулек, добија значително помала поддршка, освојувајќи седум, односно нешто повеќе од еден процент од гласовите.
Изборите се одржаа на 72 избирачки места низ огромниот остров.
Според Би-Би-Си, стратешката позиција на Гренланд и неговите огромни минерални ресурси го привлекле вниманието на Трамп.
За време на неговиот прв мандат како претседател на САД во 2019 година, тој ја спомна идејата за купување на островот.
Откако повторно се врати во Белата куќа на 20 јануари оваа година, Трамп ја обнови својата намера Гренланд да стане американска територија.
Гренланд ни е потребен за национална безбедност. „Тоа ќе биде наше, вака или онака“ – изјави Трамп во говорот пред Конгресот минатата недела, обраќајќи се до членовите на Претставничкиот дом и Сенатот.
Сепак, властите и на Гренланд и на Данска постојано ги отфрлаа неговите барања.
Премиерот Егеде јасно стави до знаење дека Гренланд не е на продажба и дека заслужува „да биде третиран со почит“.
