Зеленски истакна дека запирањето на нападите врз енергетската и цивилната инфраструктура, како и прекинот на воените операции во Црното Море, би биле добар почеток за завршување на конфликтот.

„Сите мора да се погрижат Русија, единствениот извор на оваа војна, да ја прифати потребата за прекин на непријателствата“, рече Зеленски.

Тој додаде дека ослободувањето на затворениците може да биде „средство за воспоставување фундаментална доверба“ и увертира кон „целосно и праведно решение“ за мир.

„Украина не само што е подготвена да ги преземе неопходните чекори за мир, туку и активно ги предлага тие чекори“, нагласи украинскиот лидер.

Освен тоа, тој потврди дека украинскиот и американскиот тим продолжуваат со соработката и изрази надеж за „значаен состанок“ меѓу двете страни следната недела. Зеленски ја поздрави и иницијативата на Европската комисија за зголемување на воената подготвеност на Европа.

Путин: Русија нема да се повлече од Украина

Во исто време, рускиот претседател Владимир Путин испрати силна порака дека Москва нема намера да отстапи во Украина.

„Русија не сака ништо што му припаѓа на некој друг, но нема да се откаже од своето“, изјави Путин за време на средбата со вработени и штитеници од Фондот на бранителите на татковината.

Тој истакна дека земјата мора да се зајакне дури и во услови на борбени операции и дека единството на нацијата е клучен фактор за успехот на руската армија на бојното поле.

Осврнувајќи се на последиците од војната, Путин потенцираше дека на семејствата на ранетите и загинатите во конфликтот мора веднаш да им се обезбеди помош, вклучително и психолошка поддршка.

„Обезбедувањето помош на учесниците во Специјалната воена операција е мисија од Бога“, изјави рускиот претседател.

Во рамки на говорот, тој го честиташе 8-ми март на сите жени, особено на оние што учествуваат во Специјалната воена операција на руската армија.

„Ви упатувам посебни зборови на благодарност и длабока почит за изборот што го направивте“, рече Путин, обраќајќи се на жените во униформа кои се на првите борбени линии.

Спротивставени ставови

Додека Зеленски ја истакнува потребата од итен прекин на непријателствата и предлага конкретни чекори за мир, Путин ја нагласува решеноста на Русија да продолжи со воените операции. Ставовите на двата лидери ја рефлектираат длабоката поделеност меѓу двете страни, оставајќи го прашањето за мирот во Украина сè уште неизвесно.