"Stellantis" неодамна одлучи да ја повлече планираната инвестиција од 1,5 милијарди евра во "Maserati", што ја доведува во прашање иднината на италијанскиот бренд на луксузни автомобили. Оваа инвестиција требаше да го поддржи развојот на електрични модели како "MC20 Folgore" и електричните наследници на "Quattroporte" и "Levante".
Финансискиот директор на "Stellantis", Даг Остерман, изјави дека е неопходно повторно да се разгледаат плановите за лансирање на новите модели на "Maserati". Минатата година компанијата забележа загуба од 260 милиони евра, додека глобалната продажба опадна од 26.600 возила во 2023 година на само 11.300 продадени единици.
Оваа одлука доаѓа во момент кога "Maserati" се соочува со сериозни финансиски предизвици. Во првата половина од 2024 година, продажбата падна за 58%, приходите се намалија за 50%, а компанијата пријави оперативна загуба од 82 милиони евра. Извршниот директор на "Stellantis", Карлос Таварес, изрази загриженост за пазарната позиција на "Maserati", истакнувајќи ја потребата од подобар маркетинг и појасни пораки кон потенцијалните купувачи.
И покрај овие предизвици, "Stellantis" претходно изјави дека нема намера да го продаде Maserati или да го спои со други италијански луксузни брендови.
Повлекувањето на инвестицијата дополнително ја усложнува ситуацијата за "Maserati", кој ќе мора да најде начини за финансиска стабилизација и адаптирање на пазарните услови за да ја осигури својата иднина во автомобилската индустрија.
