"OpenAI" во неделата го претстави "Deep Research", нова функција која му овозможува на "ChatGPT" да наоѓа, анализира и обработува податоци од стотици веб-локации и други онлајн извори за да креира аналитички извештаи.
Покрај поставувањето прашања, корисниците ќе можат да прикачуваат датотеки во различни формати (вклучувајќи PDF и XLSX) кога ја користат оваа функција. Ќе биде потребно малку подолго од вообичаено да се одговори, бидејќи "ChatGPT" ќе потроши помеѓу пет и 30 минути на анализата. Панелот на екранот ќе го прикаже напредокот и она што моментално се обработува. "OpenAI" наведува дека за околу десет минути корисниците ќе добијат одговор кој ќе биде споредлив со часови и денови на човечки истражувања.
Во однос на квалитетот и точноста на дадената содржина, "OpenAI" наведува дека "ChatGPT Deep Research" понекогаш може да „халуцинира“ и прикажува неточни информации, но се нагласува дека тоа се случува во „забележително“ помал процент отколку кај конкурентите. Дополнително, забележано е дека оваа алатка не секогаш успева да разликува што е официјална информација, а што е шпекулација. Исто така, забележано е дека грешките во форматирањето на текстот повремено се појавуваат во извештаите. Ова значи дека вештачката интелигенција сè уште не е целосно подготвена да ги замени луѓето во овие сложени анализи, но работи на тоа. Генерално, од компанијата наведуваат дека очекуваат барем некои од овие проблеми брзо да се поправат, бидејќи системот ќе биде дополнително обучен преку употреба.
Ова не е единствената алатка за анализа на содржината, бидејќи "Google" нуди слична функционалност во својот пакет "Advance", со речиси идентичен сет на функции. Единствената сериозна разлика помеѓу двете функционалности е тоа што "Google" нуди пристап до" Gemini Advanced" за 20 долари месечно (план One AI Premium), додека цената за планот "ChatGPT Pro" е десет пати повисока (200 долари месечно). "OpenAI" ја објаснува оваа цена со многу високите барања за обработка на оваа функција. Затоа, корисниците на "Pro plan" (барем на почетокот) ќе бидат ограничени на 100 прашања за "Deep Research" месечно.
"OpenAI", исто така, објави дека работи на поедноставена верзија на "Deep Research", која ќе се напојува со помал, попристапен модел. Исто така, оваа алатка моментално е достапна во САД, додека корисниците во Европа ќе мора да почекаат уште малку додека компанијата не ја активира оваа функционалност и за нив.
