Неодамнешните научни истражувања покажуваат дека популацијата на стаорци во градовите рапидно расте поради глобалното затоплување. Во анализата на 16 градови низ светот, најголем пораст на бројот на глодари е забележан во Вашингтон, Сан Франциско, Торонто, Њујорк и Амстердам.
Според истражувањето објавено во списанието „Science Advances“, во единаесет од овие градови забележани се „значителни трендови во растот на популацијата на стаорци“ и овие трендови веројатно ќе продолжат и во наредните години. Научниците кои ги проучувале податоците за „инвазијата“ на стаорци објавија дека бројот на глодари се зголемил за 390% во Вашингтон, 300% во Сан Франциско, 186% во Торонто и 162% во Њујорк во текот на изминатата деценија.
Големите градови како Лондон и Париз не беа вклучени во студијата поради недостаток на податоци, но истражувачите веруваат дека резултатите можат да се применат во многу други метрополи низ светот. „Нема причина да се мисли дека ситуацијата би била поинаква на други мести“, рече водечкиот истражувач Џонатан Ричардсон од Универзитетот во Ричмонд во Вирџинија.
Торонто меѓу најтешко погодените градови
Во Торонто, еден од градовите кои се најпогодени од оваа појава, жителите се сведоци на драматичен пораст на популацијата на глодари. „Кога одите по улиците на Торонто, под вас, длабоко во канализациониот систем, се наоѓа подрачје кое е полно со стаорци“, рече Алис Синиа, главен ентомолог во компанијата Оркин.
Точниот број на стаорци останува непознат бидејќи никогаш не бил систематски проучуван, додаде Синиа. Двајца градски советници од Торонто, Алехандра Браво и Амбер Морли, минатата година повикаа на развој на формален план за управување со цел да се реши проблемот. „Тоа е сериозна закана за квалитетот на животот кога луѓето наидуваат на стаорци во нивните домови, канцеларии или работни места“, рече Браво.
Други градови кои забележале зголемување на бројот на стаорци се Оукланд, Бафало, Чикаго, Бостон, Канзас Сити и Синсинати. Студијата се фокусираше врз американските градови, како и врз Амстердам, Торонто и Токио, бидејќи овие градови бележат слични податоци за забележани стаорци.
Истражувањето не ја квантифицираше вкупната популација на стаорци, туку само релативното зголемување на поплаките со текот на времето. Авторите на студијата истакнуваат дека зголемувањето на температурата е поврзано со зголемување на бројот на стаорци. Стаорците тешко ја преживуваат зимата поради нивната големина, но при повисоки температури можат да се размножуваат во текот на поголемиот дел од годината и можат подолго да бараат храна.
Особено во Торонто, студените зими долго време служеа како „природна контрола на штеточинците“, елиминирајќи значителен број глодари. Меѓутоа, повисоките температури поттикнаа експлозија во популацијата на стаорци во градот.
