[ВИДЕО/ФОТО] Циклон „бомба“ ја погоди Европа: Најсилни ветрови, откажани летови и железнички линии

Обединетото Кралство и Ирска беа погодени од бурата Еовин, која донесе невидени услови за оваа област.

Како што пренесе Скај њуз, утринава се откажани бројни летови на аеродромите во Глазгов, Единбург и Даблин поради бурата Еовин.

На аеродромот во Даблин, од 3:30 часот по полноќ, откажани се 110 полетувања и пристигнувања.

„Можни се натамошни откажувања на летови во текот на денот“, соопштија од аеродромот.

Неколку железнички компании исто така издадоа предупредување до патниците да не патуваат на планираните патувања.

Сите железнички линии се прекинати во Шкотска, како и во поширокото подрачје на Лондон и другите делови на Англија и Велс. Ирска забележа најсилната брзина на ветерот измерена досега во таа земја.

Според извештаите, во 4:00 часот утринава во Мејс Хед, округот Голвеј, ветерот дуваше со брзина од 135 километри на час.

Претходниот рекорд од 131 километар на час беше измерен во Фојнес, округот Лимерик, во далечната 1945 година.

На социјалните мрежи се појави видео од округот Кери, на кое се гледа „пијавица“ која се формира во услови на бурната временска состојба.

Си-Ен-Ен пренесе дека бурата Еовин е „бомба циклон“, која се формираше над Северниот Атлантски Океан, брзо се засили и се очекува да донесе снежни врнежи, како и обилни дождови во некои делови на Обединетото Кралство и Ирска.