Манчестер Сити френетично се обидува да го освежи тимот во јануарскиот преоден рок, а менаџерот Пеп Гвардиола се надева дека со „свежа крв“ ќе успее да ја врати екипата на препознатливата патека и поблиску до премиерлигашкиот врв.
Откако обезбеди дефанзивец од Ленс и е блиску до потписот на Омар Мармуш од Ајнтрахт, Сити сега се фокусирал на бековските позиции и го пикирал Андреа Камбијасо.
Италијанецот се смета за еден од фудбалерите со најголем потенцијал на „чизмата“, па иако сезонава не игра во најдобра форма, го привлекол вниманието на англискиот шампион.
Англиските медиуми тврдат дека Сити е подготвен без проблем да исплати 60 милиони евра за Камбијасо, но Јувентус го информирал ривалскиот клуб дека може да се надева на ваков трансфер само под еден услов.
Истиот подразбира дека во клупската каса на „бјанконерите“ ќе пристигнат 80 милиони евра и ништо помалку, сума која е проценета како доволна да ја оправда разделбата со еден од најквалитетните играчи во составот на Тиаго Мота и тоа среде сезона.
Јувентус плати 13 милиони евра за потписот на Камбијасо во 2022 година, а деновиве веќе промовираше засилување на бековските позиции во Португалецот Алберто Кошта.
