„Благај е едно од најубавите места во Босна и Херцеговина, кое се наоѓа на југоистокот од земјата, во близина на градот Мостар. Населбата е позната по својата богата историја, природни убавини и уникатното културно наследство. Благај има длабоки корени уште од антички времиња, а подоцна бил важен центар во средниот век, кога служел како седиште на херцегот Стјепан Косача.

За време на османлискиот период, ова место станало важен административен и културен центар, што се одразува врз архитектурата и традициите кои и денес го красат селото. Фасцинантна тврдина на ридот, 200 метри над изворот на Буна, позната како „Стјепанград“, има антички корени, а на овој локалитет се пронајдени остатоци од илирска керамика“, вели успешниот фотограф.

Буна и Буница

„Најголемата атракција во Благај е изворот на реката Буна, еден од најсилните карстни извори во Европа. Водата од изворот излегува од подземен пештерски систем и ја формира реката Буна, чијашто бистрина и студенило ги маѓепсува посетителите. Изворот е опкружен со високи карпи кои дополнително ја зголемуваат импресивноста на оваа природна убавина.

Покрај изворот на реката Буна, тука е и фасцинантниот извор на реката Буница, кој е директно поврзан со реката Заломка. Според истражувањата, овој извор е длабок околу 70 метри. Покрај изворот на Буна се наоѓа познатото Благајско теќе, изградено во 16 век за дервиши од бекташкиот ред.

Теќето, со својата автентична архитектура, претставува совршен спој на духовноста и природата и е едно од најпосетуваните места во Херцеговина. Мирот и спокојството кој ги нуди ова место привлекува бројни туристи и аџии од целиот свет. Во Благај се наоѓа и Султан Сулејманова џамија (Царева), изградена на почетокот на 16 век.

Благај е идеално место за љубителите на природата, историјата и културата. Посетителите можат да уживаат во прошетките, традиционалната босанска кујна во блиските ресторани и да истражуваат културни знаменитости како што е Стјепанград. Покрај тоа, во текот на целата година во Благај се одржуваат различни културни и верски настани, кои дополнително го збогатуваат искуството од посетата.

Ова претставува совршено место за бегство од метежот и градската врева, каде што можете да почувствувате мир и тишина, впивајќи ја убавината на недопрената природа и богатата историја. Без разлика дали сте љубители на природните убавини, архитектурата или духовноста, Благај сигурно ќе ве воодушеви. „Во Благај постои и адреналинска атракција, алпинистичкиот локалитет кој привлекува гости и спортисти од целиот свет“, вели Борис, нагласувајќи дека Благај неодамна беше вброен во престижната листа на најубави села во Босна и Херцеговина.