Кардиолог истакнува колку е важно да се води сметка и за количината и за видот на сирењето што се консумира.
Храната по која посегнуваме кога ни е потребна утеха обично има богат вкус и пријатна текстура, поради што создава чувство на задоволство. Сирењето е чест дел од таквите оброци, а постојат индикации дека неговото консумирање може да влијае и врз расположението.
Експертите објаснуваат дека сирењето содржи протеини и аминокиселини кои го поттикнуваат лачењето на хормони поврзани со чувството на благосостојба, што објаснува зошто многумина го доживуваат како храна која носи среќа.
Меѓутоа, кога станува збор за здравјето на срцето, видот на сирењето што го избираме игра значајна улога, наведува порталот „Govorise“.
Кардиологот д-р Тарикша Сајед истакнува колку е важно да се води сметка и за количината и за видот на сирењето што се консумира.
„Умереното консумирање сирење обично има мало влијание врз нивото на LDL холестеролот, но сирењата со висока содржина на масти можат значително да го зголемат доколку се јадат во преголеми количини или премногу често“, изјавил тој за „Parade“.
Главната причина за тоа е содржината на заситени масти, кои го зголемуваат ризикот од срцеви заболувања, мозочен удар и висок крвен притисок.
Најпроблематични се сирењата со висока содржина на заситени масти и натриум.
Д-р Сајед објаснува: „Преработените сирења и тврдите сирења со висок процент на масти – како чедарот и пармезанот – содржат поголеми количини заситени масти и сол, што може да доведе до зголемување на нивото на LDL холестеролот и крвниот притисок“. Најлош избор е маскарпонето, кое содржи дури 29 грама заситени масти и 44 грама вкупни масти по порција. За споредба, околу 56 грама чедар содржат 23 грама заситени масти и 364 милиграми натриум – количини со кои многу брзо се надминуваат дневните вредности препорачани од Американското здружение за срце („American Heart Association“).
Сепак, постојат и видови сирење кои се сметаат за покорисни за здравјето на срцето.
Д-р Сајед препорачува видови со помала содржина на масти, како моцарела, рикота и зрнесто сирење („cottage cheese“). На пример, половина шолја рикота содржи десет грама заситени масти, додека истата количина зрнесто сирење содржи само три грама.
Покрај самиот избор на сирење, важна е и храната со која тоа се комбинира. Експертите советуваат сирењето да се консумира со овошје или интегрални житарки, што помага во контролирањето на големината на порциите и одржувањето на нутритивната рамнотежа. Умереното консумирање и внимателниот избор овозможуваат сирењето да остане дел од исхраната без значителен ризик за здравјето на срцето.
