Епл Мартин, 22-годишната ќерка на актерката Гвинет Палтроу и фронтменот на групата „Колдплеј“, Крис Мартин, направи голем чекор во светот на модата. Младата наследничка на славниот пар за првпат прошета на професионална модна писта и тоа на престижната Париска модна недела.
Епл се појавила на ревијата на модната куќа „Клои“ за сезоната пролет/лето 2027, каде што носела креација која совршено ја отсликува романтичната, бохо естетика на брендот.
На модната писта се појавила во долг бел фустан украсен со перфорации и карнери, со раскошни ракави кои дополнително ја нагласиле лелеавата силуета.
Со фустанот носела кафеави сандали со платформа, додека остатокот од изгледот бил едноставен и ненаметлив. Нејзината долга руса коса ѝ била стилизирана во нежни бранови, а шминката речиси целосно природна, со што вниманието останало насочено кон самата креација.
Од кампањи до првата модна писта
Иако ова било нејзиното прво професионално појавување на модна писта, Епл веќе извесно време постепено го гради своето место во модната индустрија.
Минатата година се појавила заедно со својата мајка во рекламна кампања на брендот „Гап“, а набргу потоа остварила соработка и со модната куќа „Клои“, станувајќи нејзино заштитно лице. Нејзиното име се поврзува и со брендот „Селф Портрет“, а се појавувала и на страниците на модните списанија.
За разлика од многу наследници на познати семејства, Епл не ги користи често социјалните мрежи и не инсистира да биде во центарот на вниманието. Сепак, во последните години сè почесто е присутна на големи модни настани, а нејзиното појавување на модната писта претставува сосема нова фаза во нејзината кариера.
