Јаник Синер може да биде суспендиран на една или две години, вели извршната директорка на ITIA, Карен Мурхаус.
Јаник Синер го чека суспензија! Ова го потврди извршната директорка на Меѓународната агенција за интегритет во тенис (ITIA) Карен Мурхаус. Италијанецот двапати падна на допинг тест поради употреба на клостебол, недозволена супстанца. Првично беше казнет само со парична казна, одземајќи ги парите што ги заработи од Мастерсот во Индијан Велс, потоа Меѓународната антидопинг агенција (ВАДА) поднесе жалба и сега се чека конечната одлука на Судот за спортска арбитража (CAS).
По тој повод од ITIA пристигнаа најновите информации кои дефинитивно може да го загрижат италијанскиот тенисер. Неговиот случај е пред CAS во средината на февруари, што значи дека по Австралија Опен, неговата сезона може да биде завршена. За една година, две? Или можеби ќе биде донесена истата пресуда? Одговорот ќе дојде за околу еден месец, но тоа што го кажа Мурхаус дефинитивно не е добро за него.
„Има неколку важни фактори. Првично беше позитивен на недозволена супстанца, но беше утврдено дека нема намера. Мора да има разлика помеѓу случајот на Ига Швионтек и Јаник Синер, бидејќи во нејзиниот случај се работи за дрога, додека ова е производ што го користел неговиот физиотерапевт. Во тој случај суспензијата може да трае од една до две години“, објасни Карен.
Причината поради која ВАДА поднела жалба е дел од првата пресуда во која се вели дека „Синер немал намера, односно не е негова вина“. „Тоа е првата одлука која вели дека не е негова вина што користел нелегална супстанца. ВАДА се жали на секој од оние аспекти што беа наведени“, додаде Карен Мурхаус.
Целиот случај привлече огромно внимание, пред сè поради двојните аршини. Се сеќаваме на случаи како Виктор Троицки или Микаел Имер, кои беа суспендирани иако не паднаа на допинг тестовите и не беа позитивни на недозволени супстанци, но имаше одредени недоразбирања при давањето примероци за анализа. Со оглед на тоа дека ова е една од главните теми во светот на тенисот, останува да се види дали и колку тоа ќе влијае на Синер на претстојниот Австралија Опен.
