Ново истражување сугерира дека симптомите кои укажуваат на срцев удар може да се појават пред да се случи, а нивното препознавање може да спаси животи.
Девет од десет луѓе кои доживеале ненадеен срцев удар надвор од болницата умираат, често во рок од неколку минути. Една од причините за високата стапка на смртност е верувањето дека срцевиот застој се случува ненадејно, без никакво предупредување.
Сепак, новото истражување покажува дека препознатливите симптоми може да се појават пред срцев удар, што им дава шанса на луѓето да реагираат навреме.
Кај мажите главен симптом е ненадејна болка во градите, додека кај жените ненадејна појава на отежнато дишење.
Овие знаци можат да се појават и до 24 часа пред срцев удар, пишува „Healthy“.
„Дури 50% од мажите и жените ги пријавуваат овие симптоми пред срцев удар“, вели д-р Сумет Чуг.
Срцев удар се јавува кога срцето наеднаш престанува да пумпа крв. Тоа е предизвикано од одредени видови на аритмии или неправилности на срцевиот ритам што го спречуваат срцето да работи нормално.
Првиот знак на срцев удар е често губење на свеста, проследено со брзо влошување на состојбата. Секоја минута без помош го зголемува ризикот од смрт за 10%, а по 10 минути повеќето луѓе нема да преживеат, предупредува д-р Чуг.
Препознавањето на раните знаци може значително да ги зголеми шансите за преживување.
Д-р Чуг и неговите колеги истражувале поединечни симптоми и групи на симптоми кои се јавуваат пред срцев удар, споредувајќи ги со податоци од луѓе кои исто така побарале итна медицинска помош, но не доживеале срцев удар.
