Фудбалската федерација на Англија (ФА) официјално го потврди наследникот на Герет Саутгејт на селекторската позиција-тоа е 51-годишниот Томас Тухел.
Тухел станува третиот странски селектор која ќе ја води англиската репрезентација по Свен Горан Ериксон и Фабио Капело. Тој оваа функција ќе почне да ја извршува од 1 јануари 2025 година и негов прв соработник ќе му биде Ентони Бери со кого претходно заедно работеа во Челси и Баерн Минхен.
- Многу сум горд што ми беше дадена честа да ја водам репрезентацијата на Англија. Одамна чувствувам лична поврзаност со играта во оваа земја, и таа веќе ми даде неколку неверојатни моменти. Да се има шанса да ја претставува Англија е огромна привилегија, а можноста да се работи со оваа посебна и талентирана група играчи е многу возбудлива.
- Соработувајќи со Ентони како мој помошник тренер, ќе направиме се што можеме за да ја направиме Англија успешна, а навивачите горди. Сакам да им се заблагодарам на ФА, особено на Марк и Џон, за нивната доверба и со нетрпение очекувам да го започнеме нашето патување заедно, - порача Тухел.
Ова за Томас ќе биде прв предизвик од ваков карактер, низ досегашната кариера има водено само клубови, а најголемиот досегашен успех дефинитивно е титулата со Челси во Лигата на шампионите.
