Таткото Леброн и синот Брони подготвени за новата сезона во НБА: „Чувството е малку лудо“

Медиумските активности на НБА тимовите пред новата сезона започнаа сериозно, меѓу кои и тимот на ЛА Лејкерс.

Фотографиите на Леброн и Брони Џејмс веднаш го обиколија светот, а легендарниот кошаркар вели дека оваа сезона е посебна и ќе биде уникатно искуство.

„Има многу возбуда, само чиста радост да бидам искрен, тоа што можам да доаѓам на работа секој ден, да тренирам напорно и да го правам тоа со мојот син, секој ден и да го гледам како напредува. Се туркаме напред. Тој ме турка, јас него, а ние ги туркаме соиграчите и обратно. „Навистина е многу радосно, тоа не е само момент за мене, тоа е момент за моето семејство“, изјави Леброн.

За учесникот на 20 Ол-стар натпревари, особено е важно што секој ден ќе го поминува со својот син.

„Искрено, ако имате деца, на моја и негова возраст, нема вистинска интеракција на секојдневна основа. Доаѓа, јаде, оди во својата соба, игра видео игри. И јас сум тука со жена ми. Цело време гледаме филмови. Значи, го нема тоа – еј, се гледаме на маса во пет попладне, мора да разговараме за работа. Нема такво нешто“, вели легендарниот кошаркар.

Таткото и синот беа заедно на денот на медиумите, се фотографираа, даваа интервјуа и покажаа како изгледа кога си семејство во вистинска смисла. И тоа ќе биде остварување на сонот на легендарниот кошаркар.

„Мислам дека најмногу се радувам на тренинзите, да играме еден против друг. Малку е лудо чувството да тренираш со татко ти, да се натпреваруваш на највисоко ниво, но од друга страна, играњето против Леброн Џејмс на тренинг е многу напорна работа… Но, навистина се радувам на тоа“, вели Брони.