Полицијата спаси Тајланѓанка откако повеќе од два часа ја давел питон.
64-годишната Аром миела садови дома во предградие на тајландската престолнина кога почувствувала неколку каснувања на ногата, вели таа во полициската снимка до која дошла "CNN". „Змијата само брзаше напред и ме касна“, рекла таа.
Питонот потоа се обвиткал околу неа додека таа не паднала на земја. Според полицијата, таа се борела два часа за да се ослободи од стисокот на змијата.
Жената повикала помош, но на почетокот никој не и одговорил. На крајот, еден од нејзините соседи ги слушнал нејзините вознемирени повици и повикал полиција на помош.
„Бевме шокирани кога видовме дека жената е легната на подот со питон обвиткан околу неа“, изјавил за "CNN" полицискиот наредник Анусорн Вонгмали од полициската станица Фра Самут Чеди во Самут Пракан, провинција јужно од Бангкок.
На видеото снимено од полицијата, жената се гледа како седи на подот во мала темна просторија, заробена во стисокот на питон кој се обвиткувал околу нејзината половина.
На спасувачите им биле потребни околу 30 минути за да ја ослободат, по што е испратена на лекување во болница, соопшти полицијата.
Змијата потоа побегнала, соопшти полицијата и додала: „Не можевме да ја фатиме“.
Тајланд е дом на 250 видови змии, вклучувајќи три вида питон – мрежест, бурмански и крвав питон – според тајландските национални паркови.
Питоните не се отровни, но убиваат со задушување, се обвиткуваат околу пленот и цврсто го стискаат за да го ограничат протокот на крв пред да ги проголтаат своите жртви цели.
Според Канцеларијата за национална здравствена безбедност на Тајланд, минатата година околу 12.000 луѓе биле лекувани поради каснувања од отровни змии и животни во земјата. Дваесет и шест лица починале од каснување од змија во тој период, според официјалните податоци.
Нападот на Аром е втор ваков инцидент во земјата што привлече глобално внимание во последните недели. Минатиот месец, питон каснал тестис на маж додека седел во бањата.
Тој успеал да ја преживее средбата удирајќи ја змијата со четка за чистење пред да повика чувар да помогне да ја отстрани, јавуваат локалните медиуми.
