Рускиот претседател Владимир Путин изјави дека Москва има намера да ја преиспита својата нуклеарна доктрина и е подготвена „да оди до крај“ што се однесува до Украина.
На прес-конференцијата по посетата на КНДР и Виетнам, Путин рече дека западните земји „ја подигаат температурата и ја ескалираат ситуацијата“ како и дека сакаат да и нанесат стратешки пораз на Русија во Украина.
- За Русија стратешки пораз би значел крај на нејзината државност и крај на илјадагодишната историја на руската држава. Тогаш зошто да се плашиме? Зарем не е подобро да се оди до крај? Ова е елементарна логика – рече рускиот претседател.
Според него, Москва во моментов размислува што може да се промени во нуклеарната доктрина, која во сегашната верзија дозволува употреба на нуклеарно оружје во случај на закана за постоењето на државата.
– Идната ревизија на доктрината се должи на фактот дека Западот ја разгледува можноста за намалување на прагот за употреба на нуклеарно оружје, а развива и експлозивни нуклеарни направи со ултра низок ефект – рече Путин.
Истовремено, според зборовите на рускиот претседател, Москва не планира во доктрината да ја воведе можноста за превентивен нуклеарен удар.
– Сè уште не ни треба превентивен напад, бидејќи во одмазднички напад на непријателот ќе му биде гарантирано уништен – рече Путин.
Според него, Русија е подготвена да ги започне мировните преговори во Украина „уште утре“ врз основа на предлозите што се на маса. На 14 јуни Путин побара од Украина да ги повлече војниците од сите територии кои Русија ги прогласи за свои и да се откаже од плановите за влез во НАТО. Покрај тоа, Западот мора да ги укине сите санкции против Русија.
Путин оцени дека реакцијата на Западот била очекувана.
- Не мислам дека таков нихилизам во однос на нашите предлози ќе остане вечно, нешто сигурно ќе се промени, вклучително и нашите услови, во зависност од ситуацијата на теренот - додаде Путин.
