Кога се пие често, зелениот чај може да помогне во контролата на тежината, да го поддржи здравјето на срцето и да обезбеди други придобивки. Зелениот чај е добра алтернатива за утринското кафе, со оглед на тоа што содржи кофеин. Еве кои здравствени придобивки се поврзуваат со овој напиток.

Помага во заштитата од слободните радикали

Зелениот чај е полн со антиоксиданти, како што се катехините, кои помагаат во борбата против оксидативниот стрес. Тој помага да се неутрализираат штетните слободни радикали во телото, со што се намалува ризикот од разни хронични заболувања. Исто така, зелениот чај може да помогне во намалување на болката во мускулите и воспалението.

Го поддржува здравјето на срцето

Редовното консумирање зелен чај може да помогне во намалувањето на нивото на ЛДЛ холестеролот, познат и како лош холестерол, пренесува „Health Shots“. Во исто време, помага да се зголеми нивото на добриот ХДЛ холестерол. Ова води до намалување на ризикот од срцеви заболувања, мозочен удар и подобрување на кардиоваскуларното здравје.

Помага во контрола на тежината

Катехините и кофеинот, кои се наоѓаат во зелениот чај, можат да го поттикнат метаболизмот и согорувањето на мастите. Овој топол напиток може дури и да ви помогне да го потиснете вашиот апетит, со што полесно ќе се придржувате до диета со контролиран внес на калории.

Го подобрува имунолошкиот систем

Зелениот чај е богат со антимикробни материи и има антивирусни и антиинфламаторни својства, пренесува „Health Shots“. Овие својства помагаат да се подобрат одбранбените механизми на телото од инфекции и да се поттикне целокупниот имунолошки систем.

Помага во подобрување на оралното здравје

Зелениот чај содржи антимикробни својства кои помагаат да се намали растот на бактериите одговорни за кариес и плак. Исто така, благодарение на антиинфламаторните својства во зелениот чај, редовното консумирање може да помогне во ублажување на болестите на непцата.