Шпанскиот судија издаде налог за апсење на сменетиот каталонски премиер Карлес Пуџдемон кој што моментално е во Белгија, изјави синоќа неговиот адвокат за белгиската државна телевизија "VRT".
„Штотуку дознав од мојот клиент дека бил издаден налог за апсење на претседателот и четворица негови министри кои што исто така моментално се наоѓаат во Белгија“, изјави адвокатот Пол Бекерт за белгиската државна телевизија "VRT".
„Господинот Пуџдемон ќе остане тука. Тој истакна дека целосно ќе соработува со белгиските власти во текот на целата процедура“, изјави адвокатот Бекерт.
Шпанската судијка вчера одреди мерка притвор без можност за кауција за сменетиот каталонски потпретседател на владата и останати седум министри кои што се обвинети за прогласувањето на независноста на Каталонија кои што останале во Шпанија и одговориле на повикот од судот.
Притворените високи функционери од сега веќе поранешната влада на Пуџдемон се обвинети за побуна против шпанската држава и користење на државни пари за организирање на референдум.
Покрај тоа, тие се обвинети и за активности против шпанскиот устав, поради што им се заканува затворска казна до 30 години.
Шпанската влада ја разреши од должноста целата каталонска влада минатата сабота и превзеде директно контролирање над Каталонија, само еден ден подоцна откако владата на Пуџдемон, после тајно гласање, прогласи еднострана независност на Република Каталонија.
Мадридските власти сега ја имаат целосната контрола над сите државни институции во Каталонија и така ќе остане се до 21-ви декември кога се распишани предвремени регионални избори.
