Овие списоци беа објавени на 15 април, а на нив се наоѓаат имиња и адреси на производители од повеќе европски земји, пишува Медуза.

Еден список, под наслов „Подружници на украински компании во Европа“, наведува 11 претпријатија во градови како Лондон, Минхен, Рига, Вилнус и Прага. Другиот, наречен „Странски претпријатија што произведуваат компоненти“, именува 10 компании, од кои некои се сместени во Мадрид, Венеција и Хаифа.

Интересно е што еден читател на порталот Медуза забележал дека на првиот список се наоѓа адресата „Lerchenauer Strasse 28“ во Минхен, за која се покажало дека припаѓа на станбена зграда.

Медведев: „Спијте мирно, европски партнери“

Од руското министерство порачаа дека списоците ги објавиле за европските граѓани „да ги разберат вистинските причини за заканите по нивната безбедност“, но и за да ги знаат адресите на „украинските“ и „заедничките“ претпријатија кои на нивна територија произведуваат дронови за Украина.

На објавата се осврна Дмитриј Медведев, заменик-претседател на рускиот Совет за безбедност, нарекувајќи ја „список на потенцијални цели за руските вооружени сили“. „А дали тие удари ќе станат реалност, зависи од тоа што следува. Спијте мирно, европски партнери!“, напиша Медведев на Икс.

Објава по средбата меѓу Зеленски и Мерц

Овој потег на Москва следуваше еден ден откако украинскиот претседател Володимир Зеленски во Берлин се сретна со германскиот канцелар Фридрих Мерц. Во пресрет на средбата, како што соопшти кабинетот на Зеленски, на двајцата лидери им биле претставени седум модели дронови произведени во заеднички украинско-германски компании.

Истиот ден Германија и Украина договорија одбранбен пакет вреден четири милијарди евра. Според договорот, Германија ќе финансира договор за набавка на неколку стотици ракети за системите за противвоздушна одбрана „Патриот“.