Конте го прозва Манчестер Јунајтед: Ако се плашат од мојот начин на работа, тогаш се плашат од победи

Точка

21/11/2026

10:41

162

Големина на фонт

а а а

Италијанскиот тренер Антонио Конте (57) го критикуваше раководството на Манчестер Јунајтед откако англискиот великан одлучи наместо него да го ангажира Маурисио Покетино, порачувајќи дека клуб што се плаши од напорна работа всушност стравува од успехот.

Конте беше меѓу кандидатите за наследник на Мајкл Керик, а за неговото доведување наводно бил заинтересиран и еден од сопствениците на Јунајтед, сер Џим Ретклиф. Сепак, дел од раководството сметал дека темпераментниот Италијанец не е вистинското решение за актуелната ситуација на Олд Трафорд.

Изборот на крајот падна на Покетино, кој ја напушти селекторската функција во репрезентацијата на Соединетите Американски Држави и потпиша договор на две и пол години.

Конте, кој на крајот од минатата сезона го напушти Наполи, не ја криеше желбата да го преземе англискиот великан. Неговите претставници го известиле Јунајтед дека е достапен, но до конкретни разговори никогаш не дошло.


Италијанецот во интервју особено реагираше на тврдењата дека неговата методологија на работа, која бара голема посветеност, била една од причините поради кои клубот не сакал да го ангажира.

„Ако некој се плаши од мојот начин на работа, тогаш се плаши од победи, бидејќи тој начин на работа носи трофеи. Тоа е мојот одговор“, порача Конте.

Трофејниот тренер смета дека клуб со историја каква што има Манчестер Јунајтед не би смеел да стравува од методи што би можеле да го вратат на врвот на англискиот фудбал.

„Јунајтед има толку голема историја што ми е чудно и да помислам дека некој би можел да се плаши од пристап чија цел е да го врати клубот таму каде што припаѓа. Последната титула ја освоија во 2013 година, под водство на Алекс Фергусон“, потсети Конте.


Италијанецот откри и дека негува огромна почит кон легендарниот шкотски тренер, со кого имал можност да помине цел ден додека работел во Лондон.

„Ја прочитав неговата книга, а додека работев во Лондон имав среќа да го посетам во неговиот дом. Поминавме еден ден заедно. Неговата страст кон фудбалот е неверојатна“, изјави Конте.

Токму затоа особено го погодуваат тврдењата дека неговата работна дисциплина би можела да претставува проблем за клубот.


„Таквите изјави ги доживувам речиси како навреда за Манчестер Јунајтед. Како некој да става вето на враќањето на клубот кон неговата историја. За големи резултати е потребен систем на работа. А ако тој систем бара многу работа, тогаш да, бара. И сите мора да работат напорно, не само фудбалерите“, нагласи Италијанецот.

Конте во текот на тренерската кариера освојуваше шампионски титули во Италија со Јувентус, Интер и Наполи, додека во Англија го предводеше Челси до шампионскиот трофеј во сезоната 2016/17.

Познат е по бескомпромисниот пристап, високите барања и бурниот темперамент, кој особено дојде до израз за време на неговиот мандат во Тотенхем. По ремито со Саутемптон (3:3) во март 2023 година, јавно ги критикуваше играчите и клупската култура, а набргу потоа ја напушти клупата на лондонскиот тим.

Манчестер Јунајтед, сепак, процени дека му е потребен поинаков профил на тренер, додека Конте останува уверен дека клубот од Олд Трафорд, доколку сака повторно да освојува трофеи, мора да биде подготвен за многу потежок пат.