На бројачот има само 195 километри, еден сопственик го чувал цели 40 години, а понудите веќе надминаа 7.000 долари.
Тешко е да се поверува дека некој денес би дал повеќе од 7.000 долари за „Yugo“, но токму тоа се случува на познатата американска аукциска платформа „Bring a Trailer“. Таму се појави „Yugo GV“ од 1986 година, кое, за разлика од повеќето зачувани примероци, речиси целиот век го поминало во гаража. На бројачот има само 121 милја, односно околу 195 километри.

Сопственикот го купил автомобилот како нов во 1986 година и го задржал четири децении. Речиси неверојатно звучи тоа што по сите тие години автомобилот останал практично недопрен. Под хаубата е познатиот 1,1-литарски четирицилиндричен мотор со скромни 55 коњски сили, во комбинација со четиристепен мануелен менувач.

Ништо егзотично: токму она „Yugo“ што го паметиме, само во речиси фабричка состојба. Опремата вклучува касетофон, носач на покривот, заден бришач, па дури и дополнително вграден клима-уред. Во моментот на проверката, највисоката понуда изнесуваше 7.100 долари, односно околу 6.100 евра, а аукцијата трае до 17 ноември.

За споредба, цената на ново „Yugo GV“ во САД во 1986 година почнувала од 4.379 долари. Автомобилот што некогаш беше предмет на шеги денес е интересен колекционерски примерок. Останува да видиме до каде ќе стигне највисоката понуда до крајот на аукцијата на 17 ноември.



























