Националната изборна комисија на Јужен Судан ги одложи изборите за 11 февруари 2027 година, поместувајќи го гласањето што претходно беше планирано за 22 декември. Тоа треба да бидат првите национални избори во земјата од прогласувањето независност во 2011 година.

Портпаролката на Комисијата, Џозефина Ачиро Фортело, изјави дека одлуката била донесена по разговори со безбедносните институции, политичките чинители и другите надлежни тела. Според неа, потребно е дополнително време за подготовка на гласачките материјали, центрите и логистиката.

И покрај новиот датум, регистрацијата на гласачите треба да се одржи од 14 до 28 ноември во 3.161 регистрациски центар низ земјата. Изборната комисија соопшти дека подготовките продолжуваат додека институциите работат на безбедносните и финансиските услови.

Трето поместување на историското гласање

Архивска фотографија од референдумското гласање во Џуба во 2011 година. Фото: Jenn Warren / USAID Africa Bureau, CC BY 2.0.

Ова е третпат да се одложува гласањето предвидено со транзицискиот процес. Мировниот договор од 2018 година требаше да ја заврши граѓанската војна и да ја одведе земјата кон избори, но роковите повеќепати беа продолжувани поради недовршени реформи, недостиг од пари и нестабилност.

Политичката криза дополнително се продлабочи откако потпретседателот Риек Мачар беше ставен во домашен притвор и соочен со судски процес. Неговата партија, СПЛМ-ИО, го оспорува начинот на кој се води транзицијата, додека судирите меѓу спротивставените сили во текот на 2025 и 2026 година повторно ја зголемија загриженоста за безбедноста.

Мисијата на Обединетите нации во Јужен Судан оценува дека изборите треба да одат паралелно со политички дијалог и доверба меѓу страните. Повеќе информации за нејзината работа се достапни на официјалната страница на УНМИСС.