Агенцијата за храна и ветеринарство ја почна распределбата на 400.000 дози вакцини против сипаници кај овци и кози до ветеринарните друштва низ државата. По дистрибуцијата треба да следува итната вакцинација на терен, според планот што претходно доби позитивно мислење од Европската комисија.

Активноста доаѓа по најавата на АХВ дека на ветеринарните друштва им претстои сериозна теренска работа. Во соопштението од 10 ноември, Агенцијата нагласи дека ветеринарните практики се првата професионална линија во заштитата на здравјето на животните и дека вакцинацијата ќе се спроведува во координација со нив.

Планот е одобрен за целата држава

АХВ на 29 октомври информираше дека се завршени административните и законските постапки, вклучувајќи го и одобрението на планот за итна вакцинација на целата територија. Тогаш беше наведено дека вакцините се очекуваат од турски производител и дека имунизацијата ќе почне веднаш по нивното пристигнување.

Архивска илустрација од вакцинација на коза во Кенија во 2006 година. Фото: U.S. Navy / Roger S. Duncan (јавен домен).

Првото потврдено присуство на болеста оваа година беше регистрирано на 27 јануари во Лопате. Станува збор за болест од листата А, а случајот беше пријавен во европскиот систем ADIS и во системот WAHIS на Светската организација за здравје на животните.

Во зафатениот регион беа воведени заштитна зона од три километри и зона под надзор од десет километри. АХВ ги повика одгледувачите да ги почитуваат биосигурносните мерки и навреме да ја пријавуваат секоја промена во здравствената состојба на стадата.

Повеќе детали за подготовките за вакцинацијата се достапни во соопштението на АХВ.