Сепак, оние кои планираат да ја посетат австриската престолнина оваа зима нема да ја затекнат глетката на која се навикнати. Познатата црвена панделка оваа година нема да биде поставена на фасадата на зградата, но тоа не значи дека целосно ќе исчезне од празничната понуда на градот.

Панделката ја красела фасадата на модната куќа „Popp & Kretschmer“, која се наоѓа во центарот на Виена, спроти Виенската државна опера. Оваа декорација стана вистинска туристичка атракција, а за време на празничниот период бројни посетители доаѓале токму за да се фотографираат пред неа. Традицијата траела од 2009 година, па за многу жители и туристи станала неизоставен дел од празничната атмосфера.

Меѓутоа, ситуацијата се променила откако се појавиле безбедносни проблеми. Имено голем број луѓе застанувале на улицата за да ја фотографираат панделката, а некои, во обид да направат што подобра фотографија, излегувале на коловозот и го попречувале сообраќајот.

Безбедносните услови ги промениле плановите

Градот Виена вовел построги безбедносни барања за поставување на оваа декорација. Меѓу нив биле организирање редарска служба, како и можност осветлувањето на панделката да се намали или целосно да се исклучи по наредба на полицијата.

Сопственикот на модната куќа, Саша Трефелик, оценил дека исполнувањето на ваквите услови би претставувало преголем финансиски товар за продавницата. Поради тоа, одлучено е оваа година да се откаже поставувањето на панделката на фасадата.

Оваа одлука разочара многу љубители на виенските божиќни декорации, особено оние кои планирале да го посетат градот во текот на ноември и декември и да се фотографираат пред познатата атракција.

Панделката сепак нема целосно да исчезне

Иако оваа зима нема да можете да ја видите огромната црвена панделка на фасадата, таа ќе го краси излогот на истата адреса, во центарот на градот.

На тој начин, Виена ќе задржи дел од својата препознатлива божиќна магија, но фотографиите од оваа локација годинава ќе изгледаат малку поинаку.