Играчите што однапред ќе го купат новото продолжение на прочуениот серијал на компанијата „Rockstar Games“ можат да ја преземат играта на конзолата и да ја подготват за денот на премиерата. Така, кога играта ќе биде отклучена, ќе можат да започнат со истражување на истата без да чекаат да заврши преземањето.

Преземањето однапред, односно „pre-load“, не подразбира порано пристапување до играта, туку овозможува потребните датотеки да бидат подготвени за почетокот на играњето. Што ги очекува, веќе може да се види во најновиот трејлер.

Британците земаат одмор поради „GTA“

Колку желно се очекува новиот „Grand Theft Auto“ покажуваат и податоците на компанијата „BrightHR“. Според нејзината процена, вработените во Велика Британија резервирале околу 83.000 дена годишен одмор во текот на ноември и декември за да ја играат „GTA VI“.

Компанијата ги анализирала податоците за отсуствата на повеќе од 1,2 милиони вработени во 70.000 фирми, а проценетата вредност на тие денови од одмор ја пресметала на 12,4 милиони фунти.

Еден посветен фан резервирал дури две недели одмор, додека „GTA“ се споменува во речиси пет отсто од барањата за годишен одмор за 19 ноември, денот на излегувањето на играта.

Судејќи според овие податоци, многумина тој ден ќе вклучат автоматски одговор на службената е-пошта и ќе се преселат во виртуелниот свет.