„Jaguar Land Rover“ („JLR“) започна правна постапка против кинескиот „BYD“ поради сомневање дека ја копирал технологијата на моделот „Defender“.

Според пишувањето на британските медиуми „The Times“ и „The Guardian“, спорот ескалирал откако судски извршители во Холандија заплениле дигитална документација од деловните простории на „BYD“, пишува „Motor1“.

Претресот, наводно, бил извршен во август во објектите на компанијата во Схидам и Хофдорп.

„JLR“ се сомнева дека „BYD“ расклопил еден примерок на „Defender“ за да ги проучи неговата конструкција и технологија, а потоа ги искористил при развојот на моделот „Ti7“, голем приклучен хибриден теренец.

Британската компанија сакала да обезбеди дигитални докази пред тие евентуално да бидат уништени.

Правните застапници на „BYD“ се спротивставиле на постапката, оценувајќи ја како обид за собирање докази без доволно јасна основа и тврдејќи дека биле запленети премногу документи.

„JLR“, од друга страна, ја обвинил кинеската компанија за попречување на постапката.

Спорот стигнал пред судот во Хаг, а прелиминарната одлука се очекувала на 11 ноември.

Таа би требало да разјасни дали постои основа за постапка поради наводна повреда на интелектуалната сопственост. Ниту „JLR“ ниту „BYD“ јавно не го коментирале случајот.

Сличности меѓу „Defender“ и моделот „Ti7“

„BYD Ti7“, кој во Кина се продава од септември 2025 година под името „Fangchengbao Ti7“, има коцкест и робустен дизајн поради кој многумина го споредуваат со „Land Rover Defender“.

Сепак, обвинувањата на „JLR“ наводно не се однесуваат само на надворешниот изглед, туку пред сè на сомневањето за обратно инженерство на технологијата на „Defender“.

Моделот „Ti7“ би требало да пристигне во Велика Британија во јануари, со почетна цена од 47.995 фунти.

Тоа е околу 20.000 фунти помалку од „Defender 110“ со седум седишта, чија цена започнува од 68.465 фунти.

„JLR“ веќе имал сличен спор.

Компанијата во 2019 година, по тригодишна правна постапка, го добила случајот против кинескиот производител „Jiangling Motor Corporation“ поради модел за кој тврдела дека го копира „Range Rover Evoque“.

Интересно е што и „Chery“, долгогодишниот партнер на „JLR“ во Кина, се соочувал со обвинувања за копирање.

Неговиот „Jaecoo 7“ често го нарекуваат „Temu Range Rover“. Моделот во октомври бил најпродаваниот автомобил во Велика Британија, со 3.412 продадени примероци.

Случајот со „BYD“ покажува до кој степен европските производители се подготвени да ги штитат своите најпознати модели и технологија пред сè посилната кинеска конкуренција.