Според тврдењата на неименуван извор за „Дејли мејл“, актерот има сè поголеми тешкотии со говорот и пронаоѓањето на вистинските зборови. Наводно, повторно му се појавило и пелтечењето со кое се борел во детството.

„Прави долги паузи, како да е замислен. Но, всушност, се обидува да ги пронајде вистинските зборови и да сфати како да се изрази“, раскажал изворот.

Со пелтечење се борел уште како дете

Вилис имал проблеми со пелтечење уште во детството, поради што го добил прекарот „Бак-Бак“. Ситуацијата се променила кога се приклучил на училишната театарска група и открил дека глумата му помага да го подобри говорот.

Со текот на времето научил да ги избегнува зборовите што тешко ги изговарал и да ги заменува со други. Според тврдењата на изворот, овој метод го користел и во текот на својата актерска кариера, но поради болеста, наводно, повеќе не успева да го применува.

Истиот извор тврди дека Вилис денес е значително потивок и поповлечен од порано. Наводно, тој е свесен дека нешто се променило, но не ги разбира целосно размерите на својата болест.

Семејството е покрај него

Семејството на Вилис во март 2022 година објави дека му е дијагностицирана афазија, нарушување кое влијае врз способноста за говор и разбирање на јазикот. Во февруари 2023 година открија дека актерот боледува од фронтотемпорална деменција, болест која може да влијае врз говорот, однесувањето и личноста.

Актерот денес живее во посебна куќа во близина на семејниот дом, каде што има 24-часовна нега. Покрај него се неговата сопруга Ема Хеминг Вилис, поранешната сопруга Деми Мур и неговите пет ќерки.

Според наводите на изворот, Вилис и понатаму ужива во кратки излети, возење со автомобил, сладолед и музика. Особено сака да го слуша Нил Дајмонд.

Неговата сопруга Ема претходно за „Сандеј тајмс“ зборувала за моментите на блискост што сè уште ги споделуваат.

„Кога ќе ме прегрне, чувствувам дека тоа и понатаму е Брус. Во таа смисла, ништо не се променило. Тоа е истовремено прекрасно и многу болно“, изјавила таа.