Рекламата со фудбалерот на Реал Мадрид е поставена на аголот меѓу улиците Хјустон и Лафајет, и зафаќа површина од приближно 17 на 23 метри. На неа Белингам го носи моделот Icon Cotton Stretch Hip Brief, а кампањата официјално беше претставена на 2 ноември.

Како што пишува „Page Six“, жителите на околните згради велат дека метежот пред плакатот не престанува.

„Луѓето по цел ден свират со сирените и излегуваат од автомобилите за да снимаат видеа“, раскажал еден од жителите.

Друг извор за овој портал изјавил дека рекламата станала туристичка атракција.

Снимките го преплавија ТикТок

Плакатот брзо се прошири на ТикТок, каде што корисниците објавуваат снимки од аголот на улиците Хјустон и Лафајет. Еден маж се пошегувал дека девојките кои велат дека одат на шопинг во СоХо, всушност не одат да купуваат дизајнерски чанти, туку да го видат Џуд.

Една корисничка на ТикТок ја потпишала снимката со порака дека ова е најубавиот поглед во Њујорк.

Корисник кој се претставува како Британец во Њујорк го снимил плакатот од улицата и напишал дека токму тоа е она што сака да го види.

Други го снимале плакатот ноќе, додека улицата под него била преполна со такси-возила, придружувајќи ги снимките со кратка порака за тоа колку го сакаат Њујорк.

На Инстаграм кружат и компилации од реакциите на минувачите. Една девојка, покривајќи ја устата со раката, напишала дека вниманието малку ѝ залутало додека се враќала дома, други им порачале на жените да возат внимателно, а еден маж ја потпишал снимката пред плакатот со порака дека СоХо не е безбедно место.

Кампањата му се исплатела и на брендот. Според пишувањата на американските медиуми, снимките со Белингам само на официјалниот профил на „Calvin Klein“ на ТикТок имаат повеќе од 128 милиони прегледи. Акциите на матичната компанија PVH во средата беа и до 6,14 отсто повисоки во споредба со периодот пред објавувањето на кампањата.

Фотографиите биле направени во август во Мадрид од страна на британскиот фотограф Оливер Хедли Пирч.

Инаку, „Calvin Klein“ го користи овој рекламен простор со децении, а рекламите поставени на него редовно привлекуваат внимание. Во јануари 2024 година таму се наоѓал плакат со актерот Џереми Ален Вајт, а во март 2025 година на истото место бил поставен плакат со музичарот Бед Бани.